भांगरभूंय | प्रतिनिधी
गोंयांत बेगीनूच उबारतलें वजन आनी माप चांचणी केंद्रः प्रल्हाद जोशी
पणजी : राज्य सरकाराचे मागणे प्रमाण केंद्र सरकारान मान्यताय दिल्लें चांचणी केंद्र बेगीनूच गोंयांत सुरू जातलें अशी म्हायती केंद्रीय गिरायक वेव्हार आनी भौशीक वितरण मंत्री प्रल्हाद जोशी हांणी दिली. शेनवारा पणजेंत आयोजीत केल्ल्या एका दिसाच्या राष्ट्रीय परिशदेच्या उक्तावण कार्यावळींत ते उलयताले. ह्या वेळार मुख्यमंत्री डॉ. प्रमोद सावंत, वजन आनी माप खात्याचें मंत्री दिगंबर कामत, केंद्रीय अतिरिक्त सचीव भारत खेरा, राज्य सचीव संजीव गडकार आनी हेर अधिकारी हाजीर आशिल्ले.
केंद्र सरकार गोंयाक वेगवेगळीं उपकरणां दितलें. हाका लागून तशेंच मान्यताय मेळिल्ल्या केंद्राक लागून हांगाच्या वजन आनी माप खात्याचें काम चड अचूक जातलें. तशेंच खात्याचें काम पारदर्शक आसतलें, जाचो फायदो गिरायक तशेंच वेपाऱ्यांक जातलो. केंद्र सरकार गिरायकांक प्राधान्य दिता. हाचे भायर उत्पादक आनी वेपाऱ्यांच्या फायद्या खातीर यत्न सुरू आसात. तांचे ईझ ऑफ डुईंग बिझनेस खातीर खाशेली तजवीज सुरू आसा. ह्या गिरायकां मदीं तशेंच वेपारी आनी उद्देजक हांचे मदीं समतोल दवरून आमी मुखार वतात अशें मंत्री जोशी हांणी सांगलें.
तांणी सांगलें, केंद्रान वजन आनी माप कायद्यांतल्या पोरणें तरतुदींत बदल केला. हाचे पयलीं सामान्य गुन्यांवांक जड ख्यास्त दिवपाची तरतूद आशिल्ली. कांय प्रकरणांनी वेपाऱ्यांक वा उत्पादकांक बंदखणीची ख्यास्त भोगची पडटाली. हातूंत आमी बदल करून नेम शिथील केल्यात. पूण वेपारी आनी उत्पादकांनीय जापसालदारकेन वागपाची गरज आसा. तांणी गिरायकांचो विस्वास मोडूंक फावना. वजन आनी माप हो दिसपट्ट्या जिणेचो म्हत्वाचो भाग. आमी डिजिटल तंत्रगिन्यान खात्यांत हाडटात. नितळ आनी पारदर्शक बाजारपेठे खातीर आमचे यत्न चालू आसात अशेंय तांणी सांगलें.
कुडचड्यां अत्याधुनीक लॅबोरेटरीः मुख्यमंत्री
विकसीत भारत 2047 चें सपन साकार करपाक वजन आनी माप खात्याची भुमिका म्हत्वाची आसतली. केंद्रान दिल्ल्या मजतीतल्यान कुडचड्यां अत्याधुनीक लॅबोरेटरी उबारतले. हाका लागून गोंयांत अचूक माप उपकरणां सयत सत्यापन आनी तपासणेंत सुदारणा जातली अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
