भांगरभूंय | प्रतिनिधी
पणजीः पर्वरी सलून चलोवपी अहिल्यानगराचे (महाराष्ट्र) 26 वर्सां पिरायेचे चलयेक गुंगीचें वखद घाल्लो सोरो पियेल्ल्यान मरण आयिल्ल्याचो दुबाव तिच्या कुटुंबान उक्तायला. ह्या प्रकरणांत कळंगुट पुलिसांनी रिझवान हुसेन (कांदोळे, मूळ उत्तर प्रदेश) हाचे आड गुन्यांव नोंद केल्लो. उपरांत ताका अटक करुन सात दीस पुलीस कोठी दिल्या.
ही घडणूक 19 ऑक्टोबराक घडिल्ली. 20 ऑक्टोबराक पुलिसांनी गुन्यांव नोंद केल्लो. मरण आयिल्ल्या चलयेच्या भावान हे संबंदी कागाळ केल्ली.
मेळिल्ले म्हायती प्रमाण, हे चली फाटलीं तीन वर्सां दुबावीत रिझवान हुसेन हाच्या मालकीच्या कळंगूटांतल्या सलूनांत काम करतालें. जानेवारी 2025 वर्सा तिणें ती नोकरी सोडून पर्वरींत स्वताचो सलून सुरू केलो. हेर कडेन काम करुन उपरांत कश्टान स्वताचो वेवसाय सुरू करपी हे तरणाटे चलयेच्या मरणाक लागून दुख्ख पातळ्ळां.
घडणुकेच्या दिसा दनपरां सुमार 1.30 वरांचेर चली आवय कडेन फोनाचेर उलयिल्ली. पूण कांय वेळा उपरांत तिचो मोबायल बंद जालो. रातच्या सुमार 9.30 वरांचेर रिझवान हुसेनान चलयेचे आवयक फोन करून तिची धूव दुयेंत आसा आनी तिका हॉस्पिटलांत व्हेल्या अशें सांगलें. धा मिनटां उपरांत ताणें परतून फोन करून चलयेक मरण आयिल्ल्याची म्हायती दिली.
मजगतीं, कळंगुट पुलिसांनी रातच्या वेळार चलयेच्या भावाक संपर्क करून जीएमसींच्या शवागारात तिची कूड दवरल्या अशी म्हायती दिली. फुडलो तपास कळंगूट पुलीस करतात.
लैंगीक अत्याचार केल्ल्याचो दुबाव
चलयेच्या भावान दिल्ले म्हायती प्रमाण, चलयेन स्वताचो सलून सुरू केले उपरांत दुबावीत रिझवान हुसेन आनी ताची घरकान्न जातीवाचक अपमानास्पद उतरां वापरून तिका मानसीक त्रास दिताले. तशेंच रिझवान हुसेनान तिका शारिरीक त्रास दिल्ल्याचोय दुबाव कागाळदारान उक्तायलां. तो सोऱ्यांत कितें तरी मिक्स करुन तिका तो पियेवपाक जबरदस्ती करतालो असोय आरोप कागाळदारान केला. तशेंच कागाळदारान लैंगीक अत्याचाराचोय दुबाव आशिल्ल्याचे कागाळींत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
