भांगरभूंय | प्रतिनिधी
पशूसंवर्धन खात्याचे नेम अधिसुचीत
पणजी: गोंयांत रेबीज दुयेंस वाडचें न्हय म्हूण पशूसंवर्धन खात्यान नेम अधिसुचीत केल्यात. तेप्रमाण भायल्या राज्यांतल्यान गोंयांत हाडटल्या सगल्या प्राण्यांची चड करून सुण्यांची आनी माजरांची नोंदणी करप बंदनकारक केल्या. तशेंच अश्या प्राण्यांचे फाटल्या एका वर्सांत लसीकरण जावप गरजेचें आसा. नाजाल्यार हांगा हाडले उपरांत धनया कडेन प्राण्यांचें लसीकरण कार्ड आसप गरजेचें केलां.
सरकारान मे 2021 वर्सा गोंयाक रेबीज नियंत्रीत क्षेत्र जाहीर केल्लें. अशें करपी गोंय देशांतलें पयलें राज्य थारिल्लें. हे खातीर एका म्हयन्यांत 60 हजार परस चड सुण्यांचें लसीकरण केल्लें. हो दर्जो कायम उरचो हे खातीर तेन्नाच हो नेम लागू केल्लो.
गोंयांत रेबीज नानपयत करपा खातीर यत्न सुरू आसात. पूण कर्नाटक आनी महाराष्ट्राच्या शिमे वेलीं सुणीं गोंयांत येत आशिल्ल्यान रेबीज मुक्त दर्जो मेळोवपाक अडचणीचें थारत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
