भांगरभूंय | प्रतिनिधी
पणजी : कर्मचारी भरती आयोगा वरवीं पारदर्शकपणान सरकारी कर्मचारी नियुक्ती करतात. नवीं नियुक्तीपत्रां दिल्ल्या कर्मचार्यांनी बरें काम करचें आनी लोकांक बरी सेवा दिवची असो उलो मुख्यमंत्री डॉ. प्रमोद सावंत हांणी मारलो. ह्यान पयलीं सरकारी कर्मचारी नियुक्त करतना खुबश्यो परीक्षा दिवच्यो पडटाल्यो. मात, आतां तातूंत सुधारणा करतना एकूच परीक्षा दवरून तातूंत पारदर्शकताय हाडल्या. पात्र उमेदवारांकूच नोकरी मेळचे खातीर सरकार यत्न करता अशें मुख्यमंत्र्यांनी म्हणलें. मुख्यमंत्र्यांचे हस्तुकीं नियुक्ती जाल्ल्या ५० नव्या कर्मचार्यांक नियुक्तीपत्रां दिलीं.
राष्ट्रीय रोजगार मेळाव्या खाला आयोजीत केल्ले हे कार्यावळींत मुख्यमंत्री डॉ. सावंत उलयताले. ह्या वेळार वीजमंत्री सुदिन ढवळीकार, खेळांमंत्री डॉ. रमेश तवडकार, समाज कल्याणमंत्री सुभाष फळदेसाय, मुखेल सचीव डॉ. व्ही. कांदावेलू आनी हेर मानेस्त हाजीर आशिल्ले.
विकसीत भारत हे ध्येय दवरून केंद्र आनी राज्य सरकार कार्यरत आसा. प्रधानमंत्री नरेंद्र मोदी हांणी आयज ‘राष्ट्रीय रोजगार मेळ्या’चें उक्तावण केलें. ताचे खाला गोंयांत ह्या ‘राष्ट्रीय रोजगार मेळ्या’चें आयोजन केलां. ह्या मेळ्यांत स्टेनोग्राफर, प्रोगामर, तांत्रीक सहाय्यक मेळून 50 नवे नियुक्त कर्मचार्यांक नियुक्ती पत्रां दिल्ल्याचें मुख्यमंत्र्यांनी सांगलें. गोंयच्या तरणाट्यांकूच सरकारी नोकरी मेळ;ची म्हूण सरकार यत्न करता. हाका लागूनच 15 वर्सांच्या गोंयांत वास्तव्यांत आशिल्ल्याच्या दाखल्या वांगडाच कोंकणी पेपरूय दवरला आनी कोंकणींत सगल्यांत चड गूण मेळयिल्ल्या उमेदवारांची निवड जाता. कोंकणीत नापास जाल्ल्यांक नोकरी दिनात. हाका लागून गोंयच्या तरणाट्यांकूच नोकरेची संद मेळटा अशें मुख्यमंत्री डॉ. सावंत हांणी म्हणलें.
मुख्यमंत्री डॉ. प्रमोद सावंत हांच्या संकल्पनेंतल्यान साकार जाल्ल्या ‘स्वयंपूर्ण मित्र’ येवजणेक ५ वर्सां पुराय जाल्ले खातीर काडिल्ले पुस्तिकेचें ह्या वेळार विमोचन करतले. तातूंत अनेकांच्या यशोगाथांचो आसपाव आशिल्ल्याची म्हायती ह्या वेळार दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
