‘ऑल गोवा म्युनिसिपल असोसिएशन’ची आयज ’टूल-डावन/पेन-डावन’ संपाची घोशणा
भांगरभूंय | प्रतिनिधी
मुरगांव: फाटल्या बर्याच काळा सावन आडकून उरिल्ल्यो मागण्यो पुराय जावंक नाशिल्ल्यान ’ऑल गोवा म्युनिसिपल असोसिएशन’न मुरगांव नगरपालिकेंत आयज, शुक्रारा 24 ऑक्टोबराक एका दिसाच्या ’टूल-डावन/पेन-डावन’ संपाची घोशणा केल्या. प्रशासनान सेगीत आस्वासनां दिवनय समस्या सुटूंक नाशिल्ल्यान कर्मचार्यां मदीं तिडकीचें वातावरण पातळ्ळां.
असोसिएशनान स्पश्ट केलें, कर्मचार्यांच्या खुबश्यो पोरण्यो समस्या आडकून आसात, जाका लागून कर्मचारी आनी कामगारांक व्हड त्रास सोसचे पडटात.
कर्मचार्यांच्यो मुखेल मागण्यो
ह्या संपा फाटल्या मुखेल मागण्यांनी सकयल्या बाबींचो आसपाव आसा:
- मॅकपी फायदे लागू करप: पात्र कर्मचार्यांक मॅकपी येवजणेचे फायदे बेगोबेग लागू करून ते वाटचे.
रितीं पदां भरप: नगरपालिकेचे कामकाज सुरळीत चलपा खातीर नेटान रितीं पदां भरचीं.
- अर्थीक लाव आनी भत्ते: कर्मचार्यां खातीर गणभेस भत्तो, शिक्षण शुल्क दिवप आनी तात्पुरत्या कामगारांक बोनस दिवप.
हेर मागण्यो: संघटणे वांगडा 26 नोव्हेंबर 2021 सावनचो करार नुतनीकरण करप आनी 27 जानेवारी 2022 दिसाच्या मागणी पत्रांतल्यो आडकून उरिल्ल्यो मागण्यो पुराय करप. तशेंच, कर्मचार्यां खातीर संरक्षक साधनां आनी कामाच्या सुविधांची पुरवण करप.
ह्या संपांत वाटेकार जाल्ल्या कर्मचार्यान सांगलें, संवादा वरवीं हे प्रस्न सोडोवपाचे आमचे सगले यत्न अपेशी थारले. हाका लागून नायलाजान आमकां संपाचो मार्ग आपणावचो पडलो. तरी, नगरपालिकेचे कामकाज सुरळीत राखपा खातीर असोसिएशन प्रशासना वांगडा कालमर्यादेंत चर्चा करपाक तयार आसा.
महेश साळगांवकार, संजीव कांबळे, उमेश कैमाणी आनी मंगलदास खांडेपारकार हांचे सयत असोसिएशनाच्या पदाधिकार्यांनी ह्या संपाच्या नोटिसीचेर सोपूत केल्ल्यान ताची प्रत एक दीस पयलींच पालिका अध्यक्षां सयत हेर संबंदीत अधिकार्यांक (उपजिल्लोधिकारी, मामलेदार, सहाय्यक कामगार आयुक्त आनी वास्को पुलीस निरीक्षक) भेटयले. कर्मचार्यांच्या ह्या आंदोलनाक लागून आयज मुरगांवां नगरपालिकेच्या सदच्या कामकाजाचेर परिणाम जावपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
