भांगरभूंय | प्रतिनिधी
मुंबय, खबरां संस्था: जायरात गुरू पीयूष पांडे हांकां शुक्रारा मरण आयलें. तांणी 70 वर्सां पिरायेचेर मुंबयक निमाणो स्वास घेतलो. ते ‘अब की बार मोदी सरकार’ ह्या घोशवाक्याचे आनी ‘मिले सूर मेरा तुम्हारा’ ह्या गीताचे लेखक आशिल्ले. सुहेल सेठ हांणी ‘एक्स’चेर एका पोस्टा वरवीं ताच्या मरणाची घोशणा केली.
पीयूष हांच्या मरणाचें कारण आजूनय कळूंक ना. अहवाला प्रमाण तांकां गंभीर दुयेंस आशिल्लें. आयज सकाळीं 11 वरांचेर मुंबयक निमणे संस्कार जातले.
पीयूष पांडे हांचो जल्म 1955 वर्सा जयपूरांत जाल्लो. तांचे भाव प्रसून हे एक दिग्दर्शक आसात आनी भयण इला अरुण ही गायिका आनी अभिनेत्री. पीयूष जायतीं वर्सां क्रिकेटूय खेळ्ळ्यात.
पीयूष हांणी पिरायेच्या 27 व्या वर्सा जायरात मळार प्रवेश केलो. तांणी तांचो भाव प्रसून पांडे हांचे पसून सुरवात केली. दोगांनीय उत्पादनां खातीर रेडिओ जिंगल्सांत आवाज दिलो. ते 1982 वर्सा ओगिल्वी जायरात कंपनीत गेले. 1994 वर्सा तांकां ओगिल्वीच्या बोर्डाचेर नामांकन मेळ्ळें. 2016 वर्सा भारत सरकारान पीयूष हांकां पद्मश्री पुरस्कारान भोवमानीत केले. तशेंच, 2024 वर्सा तांकां LIA लेजेंड पुरस्कार मेळ्ळो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
