भांगरभूंय | प्रतिनिधी
पणजी: पर्वरेचे पत्रकार कॉलनींत पोशिल्ल्या जर्मन शेफर्ड सुण्यान कामगाराचेर हल्लो केल्ल्याचे घडणुकेक पंदरा दिसूय जावंक नात. आतां परत त्याच सुण्यान काल दनपरां शेजार्याचेरूच हल्लो केलो. सुणो अचकीत घराची गेट उगडून भायर आयलो आनी ताणें घोवाचेर हल्लो केलो. ताच्या तोंडाक जखम जाल्ल्याचें सुशीला रॉड्रिग्स हांणी सांगलें.
ह्या घरांत तीन हिंसक सुणे आसात. तांतले दोन जर्मन शेफर्ड. गेटी कडेन येवन हे सुणे येतल्या-वतल्यांक भोंकतात. ते गेटीचेर चडपाचोय यत्न करतात, हाका लागून तांच्या भंयान लोकांनी ते वटेन यो- वच करपाचें सोडून दिलां. सुण्यांक भायर पासये खातीर व्हरपाक घर धनी भायर काडटात. तेन्ना रस्त्यावेल्यान चलत वचपी आनी हेरांक ह्या हिंसक सुण्यां कडल्यान वतना जीव मुठींत घेवन चलचें पडटा.
ह्या आक्रमक सुण्यांक पासयेक हाडपी मनीसूय भियेतूच कसोबसो घेवन चलता. केन्ना ते सुणेच त्या मनशाक ओडून व्हरतात काय? अशें चित्र पळोवपाक मेळटा. हे घडणुके उपरांत रीतसर कागाळीची वाट पळयनासतना पंचायत आनी पुलिसांनी हे विशीं खर कारवाय करची आनी त्या सुण्यां पसून आनी धनया पसून राखण करपाची मागणी लोक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
