भांगरभूंय | प्रतिनिधी
ताकतिकेन रेल्वेंत चडटना पांय निसरून पडलो
मडगांव: गोंयांत काम सोदपा खातीर आयिल्लो ओडिशाचो अविनाश रॉय (30) काम मेळूंक नाशिल्ल्यान तो निरशेवन परतून आपल्या गांवांत वचपा खातीर रेल्वेंत चडत आसतना पांय निसरून रेल्वे पोंदा पडलो. जखमी रॉय हाका उपचारा वेळार मरण आयलें.
मेळिल्ले म्हायती प्रमाण ओडिशाचो अविनाश रॉय हो तरणाटो कामाच्या सोदांत आपल्या मामेभावा सयत गोंयांत आयिल्लो. बुधवारा गोंयांत आयले उपरांत ज्या मनशान काम दिता म्हूण सांगिल्लें त्या मनशाचो मोबायल लागना जालो. त्या मनशाचो फोन लागना हे निरशेवणेन रॉय आनी ताच्या मामेभावान परतून गांवांत वचपाचो निर्णय घेतलो.
काल (बिरेस्तारा) मडगांव रेल्वे स्टेशनार ते आयिल्ले तेन्ना शालिमार एक्सप्रेस ही अमरावतीक वचपी रेल्वे उबी आशिल्ली. तांणी स्टेशनार चवकशी केली तेन्ना ती गाडी झारखंडाक वतली अशें तांकां कोणे तरी सांगलें. ताका लागून गडबडींत ते दोगूय गाडयेंत चडले.
ह्याच वेळार अविनाश रॉय हाचो पांय निसरलो आनी तो चलते गाडये खाला पडलो. गाडी दोनूय पांयां वेल्यान गेल्ल्यान अविनाशाक गंभीर दुखापत जाली.
ताका रोखडोच दक्षीण गोंय जिल्हो हॉस्पिटलांत दाखल केलो. पूण उपचारा वेळार ताका मरण आयलें. ह्या प्रकरणाची कोंकण रेल्वे पुलिसांनी असैमीक मरण म्हूण नोंद केल्या. पुलीस निरिक्षक राहूल नायक हांच्या मार्गदर्शना खाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
