भांगरभूंय | प्रतिनिधी
पणजी: दामबाब आनी मडगांवकारांच्या आशिर्वादाक लागून मडगांवां फाटलीं 30 ते 35 वर्सां हांव राजकारणांत तिगून आसा. 50 वा 100 विरोधक एकठांय आयले म्हूण म्हाका कसलोच फरक पडचो ना अशें दिगंबर कामत हांणी सांगलें.
पणजे एका हॉटेलांत घेतिल्ले पत्रकार परिशदेंत ते उलयताले. दिवाळे पयली फातोड्ड्यां एका सुवाळ्यांत काँग्रेसीचे युरी आलेमांव, आरजीचे मनोज परब आनी गोवा फॉरवर्डाचे विजय सरदेसाय एकठांय आयिल्ले. हाचे उपरांत विरोधकांच्या एकवटाचेर चर्चा सुरू जाली. भाजपाक हाराेवपा खातीर विरोधी पक्षांनी एकठांय येवपाची गरज आसा अशें विजय सरदेसाय हांणी खूबशे खेपे म्हणलां. हे फाटभुंयेर विरोधकांच्या एकवटाची चर्चा सुरू जाल्या.
हे फाटभुंयेर भौशीक बांदकाम खात्याचे मंत्री दिगंबर कामत हांणी हे उलोवप केलें. विरोधक 50 वा 100 लोक एकठांय आयले म्हूण म्हाका फरक पडचो ना. मडगांवचो दामबाब आनी मडगांवकारांचो आशिर्वाद म्हाका आसा. हे विशीं वीज मंत्री सुदिन ढवळीकार हांणी लेगीत योग्य अशें उलाेवप केलां, अशें दिगंबर कामत हांणी सांगलें.
हारशांत पळयल्यार नरकासूर कोण ते कळटलें
नरकासूराक नश्ट करपाची भास बखूबश्या जाणांनी केल्या. नरकासूर कोण? हें पयलीं कळपाक जाय. हारशांत तोंड पळयत जाल्यार नरकासूर कोण तें कळटलें अशें दिगंबर कामत हांणी सांगलें.
भाजपाच्या आमदारांक नरकासूर म्हणपी लोकांनी आपणाक देव समजुचे न्हय, अशें मुख्यमंत्री डॉ. प्रमोद सावंत हांणी उलोवप केल्लें. हाचे उपरांत मगोचे आमदार आनी मंत्री सुदिन ढवळीकार हांणी लेगीत रातभर सोरो पियेवन जे मस्ती करतात, ते खरे नरकासूर अशें उलोवप केल्लें. हाचे उपरांत दिगंबर कामत हांणी दर एकल्यान हारशांत पळयल्यार नरकासूर कोण तें कळटलें, अशें उलोवप केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
