भांगरभूंय | प्रतिनिधी
वजन, मापांच्या उपकरणांक आतां क्यूआर कोड
पणजी: वजन आनी माप खात्याच्या नियंत्रकांची पयली राष्ट्रीय परिशद फाल्यां 25 ऑक्टोबराक पणजेंतल्या हॉटेल मॅरियॉटांत जातली. मुख्यमंत्री डॉ. प्रमोद सावंत, केंद्रीय गिरायक वेवहार खात्याचे मंत्री प्रल्हाद जोशी, गोंयचे वजन, माप खात्याचे मंत्री दिगंबर कामत, केंद्रीय सचीव निधी खरे आनी हेर मानेस्त उक्तावणाक हाजीर आसतले. गोंयांतल्या वजन आनी माप उपकरणाक क्यूआर कोड बसोवपाचो प्रस्ताव आसा. खात्याच्या सेवांचे डिजिटायझेशन, नवे नेम तशेंच सगल्या राज्यांतल्या वजन, माप खात्याच्या वेव्हारांत समानताय हाडपाचेर परिशदेंत चर्चा जातली.
वजन आनी माप खात्याचे मंत्री दिगंबर कामत हांणी पत्रकार परिशदेंत ही म्हायती दिली. ह्या वेळार खात्याचे सचीव संजीव गडकार आनी नियंत्रक अरूण पंचवाडकार हाजीर आशिल्ले.
पयलीच परिशद गोंयांत जाता. सगल्या राज्यांतले तशेंच केंद्राचे अधिकारी वांटेकार जातले. वेवसाय सुलभीकरण तशेंच डिजिटायझेशनाचेर परिशदेंत भर आसतलो अशें दिगंबर कामत हांणी सांगलें.
दरेका राज्यां खातीर वजन आनी माप नेमांत समानताय हाडप, सेवां खातीर हेल्प डेस्क स्थापन करप, परवान्यांचे ऑटो रिनिव्हल करपाचो प्रस्ताव आसा अशें खात्याचे नियंत्रक अरूण पंचवाडकार हांणी सांगलें.
भांगराच्या दरांत वाड जायत आसा. 1 मिलिग्राम मेरेनचें भांगर जोखपा खातीरचें माप उपलब्ध करतले अशें पंचवाडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
