भांगरभूंय | प्रतिनिधी
पणजी : बांबोळे दोन दिसां फाटीं जाल्ल्या अपघातांत दोग अग्नीवीर नौदळ कॅडेटांक मरण आयलें. बुलेटीचो धपको डिवायडराक बशिल्ल्यान हो अपघात जालो. हातूंत मरण आयिल्ल्यांचीं नांवां हरिगोविंद पी. (22 , कोलम, केरळ) आनी विष्णु जयप्रकाश (21, कन्नुर, केरळ) अशीं आसात. हे दोगूय तरणाटे अग्निवीर आशिल्ले, तांचो गोंयच्या आयएनएस हंसा कडेन संबंद आशिल्लो.
आगशी पुलिसांनी दिल्ले म्हायती प्रमाण, बांबोळी सैनिकांच्या विसव घरा मुखार 21 ऑक्टोबराक फांतोडेर 4.30 वरांचेर हो अपघात जालो. उपरांत दोगूय तरणाट्यांक बांबोळेच्या गोंय वैजकी महाविद्यालयांत व्हेले. मात तांकां मरण आयिल्ले अवस्थेंत हाडिल्ल्याचें पुलिसांनी घोशीत केलें. हे घडणुकेची म्हायती मेळटांच नौदळ अधिकारी गोमेकॉत पावले. तांचें कुटूंबूय गोंयांत पावलें. नौदळाच्या कोचीच्या मुख्यालयांतल्यान ह्या दोगांकूय विशेश ‘ड्युटी’ खातीर गोंयांत धाडिल्ले.
वास्कोच्या आयएनएस हंसा तळार निमाणो निरोप कार्यावळ जाले उपरांत दोगांच्योय कुडी तांच्या मूळ गांवांत धाडल्यो, अशी म्हायती आगशी पुलीस स्टेशनांतल्या सुत्रांनी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
