भांगरभूंय | प्रतिनिधी
पणजीः कोंकणी भाशेंत खाजगी अनुवादकांचें एक पॅनल तयार करपाच्या हेतान खांडोळा सरकारी महाविद्यालयाच्या कोंकणी विभागान राजभास संचालनालयाच्या जोडपालवान अल्प काळा खातीरचो तांत्रिकी अणकाराचो प्रमाणपत्र अभ्यासक्रम घडोवण हाडटले. हो अभ्यासक्रम ६ दिसाचे काळा खातीर आसतलो.
प्रशासकी, कायदेशीर आनी शिक्षणीक अणकाराचो आस्पाव आशिल्ल्या तांत्रिकी अणकाराच्या प्रमाणपत्र अभ्यासक्रमा खातीर खांडोळा सरकारी महाविद्यालयान इत्सूक उमेदवार तशेंच खाजगी अनुवादकांकडल्यान अर्ज मागयल्यात. उमेदवारां भितर तांत्रिकी अणकारांची तंत्रां आनी कुशळाटयेची उदरगत करपा खातीर तशेंच कोंकणी भाशेंत खाजगी अनुवादकांचें पॅनल तयार करपा खातीर ह्या अभ्यासक्रमाचो हेत आसा.
ह्या अभ्यासक्रमा खातीर चडांत चड ५० सिटां उपलब्ध आसात. खांडोळा सरकारी कला, विज्ञान आनी वाणीज्य महाविद्यालय मार्शेल हांगां नोव्हेंबर ३ ते नोव्हेंबर ८ मजगतीं ह्या दिसांच्या कालावधी खातीर सकाळीं ९.३० ते ४.३० वरां मेरेन आसतलो.
ह्या अभ्यासक्रमांत वाटेकार जावपा खातीर इत्सुकांकडेनं खयच्या फाट्यांत उच्च महाविद्यालाचें प्रमाणपत्र आनी १५ वर्साचो राबितो दाखलो गरजेचो आसा. तशेंच इंग्लीश आनी कोंकणी अणकाराचें मुळावें गिन्यान, कंम्प्युटराचेर देवनागरी टायपींगचें (इन्सक्रिप्ट) गिन्यान आनी कोंकणी भाशेंत व्याकरणाचें मुळावें गिन्यान आसा. १८ वर्सां पिराये सकयल्या उमेदवारांक ह्या अभ्यासक्रमांत वाटेकार जावपाक मेळचें ना. जाल्यार ताचे परस चड पिरायेंत कसलीच मर्यादा ना.
ह्या अभ्यासक्रमांत वाटेकार जावपा खातीर इत्सुकांनी २९ ओक्टोबर, दनपरां २ वरां पयलीं आपलो अर्ज ऑनलायान वा ऑफलायन माध्यमांतल्यान भरचो. उमेदवारांक उपरांत ३० ऑक्टोबराक सकाळीं ११ वरांचेर मुळावी लेखी परिक्षा खांडोळेंच्या महाविद्यालयांत दिवची पडटली. हे परिक्षेचो निकाल ३१ ऑक्टोबर २०२५ वर्सा महाविद्यालयाचे वेबसायटीचेर जाहीर जातलो. पात्र उमेदवारांक अभ्यासक्रमा खातीर रु. ५०० इतलें नोंदणी शुल्क भरचें पडटलें.
अभ्यासक्रम सोंपले उपरांत एक परिक्षा सगळ्या उमेदवारांक दिवची पडली आनी उपरांतच राजभास संचालनालय खाजगी अनुवादकांचें पॅनल स्थापन करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
