ज्येश्ठ कलाकारां खातीर केंद्र सरकाराची अर्थीक मदत येवजण

भांगरभूंय | प्रतिनिधी

पणजी: कला आनी संस्कृती संचालनालयान केंद्र सरकाराच्या ‘ज्येश्ठ कलाकारां खातीर अर्थीक मदत’ हे येवजणेचो लाव घेवपा खातीर अर्ज मागयल्यात. राज्य सरकाराच्या कला सम्मान येवजणे सारकीच ही येवजण.
पात्र जावपाक अर्जदारांची पिराय साठ वर्सां परस उणी आसची न्हय. तशेंच वर्सुकी येणावळ ताच्या जोडीदाराच्या येणावळी सयत 72,000/- रूपया (वर्साक) परस चड आसपाक जायना. हातूंत लावधारकांक राज्य सरकाराकडल्यान आदींच मेळपी पेन्शन मदत रक्कमेचो आसपाव ना. पात्र कलाकारांक म्हयन्याक चडांत चड 6000 रूपया अर्थीक मजत दितले. ही रक्कम राज्य आनी केंद्र सरकार वांटून घेतले.
ज्या कलाकारांक ह्यान पयलींच कला सन्मान येवजणेचो लाव मेळटा ते कला आनी संस्कृती संचालनालया कडल्यान शिफारस पत्र घेवन वयल्या केंद्रीय येवजणेचो लाव घेवपाक शकतात. जे कलाकार कला सन्मान येवजणेचो लाव घेनात ते विभागीय सांस्कृतीक केंद्र, संस्कृती मंत्रालय (पश्‍चीम विभाग सांस्कृतीक केंद्र, उदयपूर) हांगा सरळ अर्ज करून हे केंद्रीय येवजणेचो लाव घेवपाक शकतात.
इत्सुकांनी चड म्हायती खातीर सोमार ते शुक्रार ह्या कामाच्या दिसांनी कला आनी संस्कृती संचालनालय, पाटो पणजी हांगा संपर्क करचो वा सांस्कृती मंत्रालयाचे https://indiaculture.gov.in/scheme-financial-assistance-veteranartists हे वेबसाटीक भेट दिवची.