भांगरभूंय | प्रतिनिधी
म्हापसा : पुलीस निरीक्षक विजय राणे सरदेसाय हांची परत दिवचल पुलीस स्टेशनांत बदली जाल्या. हालींच तांची उत्तर गोंय पुलीस राखीव विभागांत बदली केल्ली. वरिश्टां कडेन आपली बाजू मांडले उपरांत परत तांकां दिवचल पुलीस स्टेशनांत धाडले. पुलीस कर्मचार्यांनी केल्ले तोंडी कागाळी उपरांत पुलीस खात्यान निरीक्षक राणे हांचेर कारवाय केल्ली. तशेंच वाळपयचे पुलीस निरीक्षक विध्देश शिरोडकार हांचे कडेन दिवचल पुलीस स्टेशनाचो उरिल्लो पदभार दिल्लो. हे विशीं बिनतारी आदेश उत्तर गोंय पुलीस अधीक्षक राहुल गुप्ता हांणी जारी केल्लो. उत्तर गोंय राखीव विभागांत हजेरी लावपाचे निर्देश निरीक्षक राणे हांकां दिल्ले.
मजगतीं, निरीक्षक राणे हांचे आड कर्मचार्यांनी केल्ले कागाळींनी गृहखात्या कडल्यान गंभीर दखल घेवन कारवाय करपाचे निर्देश वरीश्ठ पुलीस अधिकार्यांक खात्या वतीन दिल्ले.
मात, बिरेस्तारा दनपरां वरीश्ठ पुलीस अधिकार्यांच्या आदेशा उपरांत निरीक्षक राणे सरदेसाय हांणी दिवचल पुलीस स्टेशनाचो परत ताबो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
