भांगरभूंय | प्रतिनिधी
आदल्या तेंपार आमच्या देशांत थारावीक पर्यटन थळां आशिल्लीं. जावं ती मागीर मजा, मस्ती करपाचीं, धर्मीक वा इतिहासीक… मात काळा प्रमाण तांचो आंकडो वाडत गेलो. साधन सुविधा वाडल्यो, पर्यटन मळाचेर सुदारणा जाली, पर्यटकांचीय अर्थीक उदरगत जाली. आतां लोक वाहन घेवन 200- 300 किलोमिटर पसून वतात. पर्यटकांचो आंकडो वाडलो तशी पर्यटन मळाक बरकत आयली. फटाफट पयसो करप, हेंच एकसुरे उद्दिश्ट नदरे मुखार दवरून गुन्यांवकारी मानसिकतायेचे लोक भितर घुसले. ठकसेनूय आयले. सरकारी यंत्रणांक तांचेर कारवाय करप जमूंक ना, हें मान्य करचेंच पडटलें. पर्यटन मळाचेर गैरप्रकार घडटात, तातूंतलो एक नवोच प्रकार उक्तडार आयला. गोंयांतल्या पर्यटकांक सैमीक थळां, उदका खेळ, हाॅटेलां दाखोवपाक व्हरप. खंय तर राज्या भायर. म्हणल्यार पर्यटकांचेर हात मारपा सारको हो प्रकार जालो. हें करता कोण, तर शेजराच्या राज्यांतले ट्रॅव्हल एजंट, टाव्ट्स. ते सरळ पर्यटकांचें अपहरणूच करतात अशेंच म्हणचें पडटलें. सरकारी यंत्रणांक फटोवन हें जाता म्हणल्यार अजापूच. पुलिसांनी हें गंभीरपणान घेवचें. नाजाल्यार थळाव्या वेवसायिकांचेर हावळ येतली.
सध्याक गोंयांत उदका खेळ मळाचेर चडशे भायले आसात. हें खुद्द गोंयकार वेवसायिकूच सांगतात. सरकारान गोंयकारांक प्राधान्य दितले हें जाहीर केलांच. खात्या वतीन पसून हो वेवसाय करुं येता. गोंयांत येवपी पर्यटकांक परस्पर वा हांगा येवन व्हरपी एजन्सी, टावट्सांक उपद्रवी म्हूण थारावन खर कारवाय करपाची शिटकावणी सरकारान दिल्या, हें बरें जालें. पूण ती चालीक लागपाक जाय. कांय म्हयन्यां पयलीं सगल्या टावट्सांचो बंदोबस्त करतले, अशी घोशणा जाल्ली. तिचें कितें जालें? फक्त उदका खेळूच न्हय, तर हेर कडेनूय असले प्रकार जायनात कित्या वयल्यान? तातूंत आतां गुन्यांवकारी प्रवृत्ती घुसल्यात. पर्यटकांक मारपाचे, लुटपाचेय प्रकार घडटात. ड्रग्सां सयत पर्यटन मळा वयले सगले नरकासूर लासून उडोवपाची आयज खरी गरज आसा.
उदका खेळाचे राज्यांत समान दर लायल्यात. पूण ते पाळटात, हाची खात्री कोण करतलो? खेळां वांगडा जेवण, खाण, रावप, थळां पळोवप हांचे खातिरूय समान दर लावंक जाय. हे खातीर पंचायतींनीय फुडाकार घेवचो. पर्यटक हो सोयरो, अतिथी. तो देवा सारको, हें आमकां केन्ना कळटलें? पर्यटन खात्या कडेन जोडिल्ल्या एजन्सी वरवींच पर्यटकांक तिकेटी मेळपाक जाय. हेरांक त्यो विकपाक बंदी घालची. ज्यो शिक्षणीक संस्था विद्यापिठा कडेन संलंग्न आसतात, तांच्याच अभ्यासक्रमाक मोल आसता. ते प्रमाण फक्त गोंयच्या पर्यटन खात्याक जोडिल्ल्या एजन्सींकूच कायदेशीर धरपाक जाय. आओ, जाओ, घर तुम्हारा, अशें बेकायदेशीर वेवसायिकांचे बाबतींत हाचे मुखार जावचें न्हय.
पर्यटक गोंयांत येतकच एक म्हायती पुस्तिका घेतात. ताचेर सगली म्हायती आसता. ही पुस्तिका एकान एक पर्यटकाक मेळपाक जाय. कितें पळोवपाचें, खंय रावपाचें, शिस्त, नेम, पुलीस- हाॅस्पिटलाचे फोन नंबर, संकश्ट आयल्यार मजती खातीर कोणाक संपर्क करप हें ताचेर आसचें. आता मोबायल अॅप, वॅबसायटीचेर सगलें मेळटा. तरीय लाखांनी पर्यटक चवकशी करिनात. कोणाचेरूय विस्वास दवरतात. मागीर फटवतकच रडून कितें फायदो?
गोंयची अर्थवेवस्था आयज पर्यटनाचेर चलता. चडशे पर्यटक कित्या खातीर येतात (दर्यावेळो, नवें वर्स मनोवपाक, देवळां, चर्च पळोवपाक…) ताचो अभ्यास जाय, थंय कितें उणाव आसल्यार ते पयस करपाक जाय. पर्यटक जेन्ना परतो वता तेन्ना ताका कितें अणभव आयलो, तो समाधानी जालो काय ना, हाची चवकशी जाल्यार पर्यटन मळा वयल्यो किडी मारप शक्य जातलें. तें केले बगर हें मळ तरतरचें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
