भांगरभूंय | प्रतिनिधी
संवसारीक पांवड्यार सर्वोच्च मानतल्या नोबॅल पुरस्काराची घोशणा दर वर्सा ऑक्टोबराच्या पयल्या वा दुसऱ्या सप्तकांत जाता. मनीस कल्याणा खातीर वावर करपी विवीध मळा वेले शास्त्रज्ञ, तंत्रज्ञ, लेखक आनी संवसारीक पांवड्यार शांतताये खातीर कार्य करपी मनशांक वा संस्थेक हो पुरस्कार भेटयतात. ह्या वर्सा ह्या पुरस्कारा कडेन सगल्या संवसाराची नदर लागून आशिल्ली. हाचें कारण ह्या वर्साचो शांततायेचो नोबॅल पुरस्कार म्हाकाच मेळटलो असो (फाजील) आत्मविस्वास अमेरिकेचे राष्ट्राध्यक्ष डोनाल्ड ट्रम्प हांकां आशिल्लो. तशें तांणी खूबशे फावटी उलोवन लेगीत दाखयिल्लें. ताका लागून तांकां खरोच हो पुरस्कार मेळटलो काय कितें? हाची उमळशीक संवसारभर पातळिल्ली.
शांततायेच्या नोबॅल पुरस्काराची घोशणा 10 ऑक्टोबराक जाली आनी ताचे वेलो सस्पेन्स सोंपलो. शांततायेचो नोबॅल पुरस्कार अमेरिकेचे राष्ट्राध्यक्ष डोनाल्ड ट्रम्प हांकां मेळ्ळोच ना. ह्या वर्साचो शांततायेचो नोबॅल पुरस्कार मेळ्ळो तो व्हेनेझुएलाच्या मारिया कोरिना मचाडो हांकां आनी मचाडो हांकां पुरस्कार कित्याक मेळ्ळो हाचे परस ट्रम्प हांकां पुरस्कार कित्याक मेळ्ळो ना हाचीच संवसारभर चर्चा चड जाली. डोनाल्ड ट्रम्प हांकां हो पुरस्कार म्हाकाच मेळटलो. हे खातीर हांवें सात झुजां थांबायलीं आनी संवसारांत शांतताय निर्माण केली, अशी सेगीत वल्गनां करून एके तरेन नोबॅल पुरस्कार समितीचेर चेपण हाडपाचो यत्न केलो. तांच्या ह्या चेपणाक नोबॅल पुरस्कार समिती बळी पडली ना. तांणी योग्य निर्णय घेवन डोनाल्ड ट्रम्प हांकां हो पुरस्कार न्हयकारून योग्य मनशाक पुरस्कार दिलो हे खातीर नोबॅल पुरस्कार समितीची तोखणाय जावंक जाय.
डोनाल्ड ट्रम्प हांकां हो पुरस्कार जाय आशिल्लो. ते खातीर तांणी व्हड प्रमाणांत थयथय घाल्लो. सेगीत हांवें सात झुजां थांबयलीं अशी वल्गनां केली. पूण अमेरिकेनूच खूबशा देशांक फूस लावन झुजांच्या कोंयडांत धुकल्ल्यात हें लिपून उरिल्लें ना. आदीं झगडीं लावन दिवप आनी उपरांत तें सोडोवपाचें नाटक करप आनी तातूंतल्यान आपलो सुवार्थ सादप हेंच अमेरिकेचें आयज मेरेनचें धोरण आसा. डोनाल्ड ट्रम्प आसूं वा अमेरिकेचे हाचे आदींचे राष्ट्राध्यक्ष आसूं तांणी हेर देशां कडेन फक्त आपल्या शस्त्रास्त्रांचे गिरायक म्हूण पळयलां. आपलीं शस्त्रां विकचीं हे खातीर अमेरिकेन खूबशा देशां मदीं झूज पेटोवन घालां, हो इतिहास आसा. आतां हेंच पळयात, भारत पाकिस्तानाचें झूज हांवेंच थांबयलें अशें सांगपी आनी ते वरवीं नोबॅल पुरस्काराचेर हक्क सांगपी डोनाल्ड ट्रम्प पाकिस्तानाक घातक शस्त्रां विकपाचे आसात अशी बातमी हालींच वाचली. जर डोनाल्ड ट्रम्प हे खरेच शांततायेचे मानकरी आशिल्ले जाल्यार तांणी पाकिस्तानाक शस्त्रास्त्रां कित्याक विकपाचे? पाकिस्तान ह्या शस्त्रांचो वापर भारता आड करतलो. जर पाकिस्तानान हीं शस्त्रां भारता आड वापरलीं जाल्यार भारतूय ताका जाप दिवपाचो. परतून संघर्श. जर हीं शस्त्रां आतंकवाद्यांच्या हातांत पडिल्लीं जाल्यार भारता सयत पुराय संवसाराक घात पातळूं येतालो. मागीर पाकिस्ताना सारक्या आतंकवादी देशांक शस्त्रां विकून संवसारभर अशांतताय पातळावपी ट्रम्प हांकां शांततायेचो नोबॅल पुरस्कार कसो मेळटलो? म्हणूनच नोबॅल पुरस्कार समितीन घेतिल्लो हो निर्णय सामको योग्य असोच आसा.
ज्या मारिया मचाडो हांकां पुरस्कार दिलाे त्यो ताच्यो हकदार आशिल्ल्योच. मारिया मचाडो ह्यो हॉवर्ड विद्यापिठांतल्यो पदवीधर आसात आनी तांच्या व्हेनेझुएला देशांतल्या हुकुमशाये आड तांणी आवाज काडिल्लो. भ्रश्ट हुकुमशाये आड स्वताचो जीव घाताक लागून झुजपी मारिया माचाडो ह्यो लोकशायेचो आवाज आसात. पोरूं वर्सा ह्या देशांत वेंचणुको जाल्यो. हे वेंचणुकेंत मचाडो उब्यो राविल्ल्यो. पूण तांकां वेंचणुकेंत उबे रावपा पसून आडायिल्लें. तांकां अपात्र घोशीत करून तांचें राजकारण सोंपोवपाचो यत्न केलो. पूण त्यो सरकाराच्या चेपणा खाला दबल्यो नात. तांणी हाचे आड आवाज उठयलो. पुराय देशाक हुकुमशाये आड एकठांय केलें. देशांत लोकशाय तिगून उरची म्हूण जीव घाताक घालून लडल्यो. ताकाच लागून तांची ह्या पुरस्कारा खातीर जाल्ली निवाड योग्य आसा. डोनाल्ड ट्रम्प आनी मारिया मचाडो हांची तुळा जावंकच शकना. लोकशायेच्या नांवा खाला हुकुमशाय राबोवपी ट्रम्प ह्या पुरस्कारा खातीर पात्र थारूंकच शकनात. म्हणून नोबॅल पुरस्कार समितीच्या ह्या निर्णयाची संवसारभर तोखणाय जायत आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
