गोंयांत रेशन घेवपी सिंधुदुर्ग आनी कोल्हापूर जिल्ह्यांतले लोक चड

भांगरभूंय | प्रतिनिधी

पणजीः गोंयांत रेशन घेवपी महाराष्ट्रांतले सगल्यांत चड लोक हे सिंधुदुर्ग आनी कोल्हापूर जिल्ह्यांतले आसात. महाराष्ट्रांतल्या सुमार 119 रेशन कार्ड धारकां मदीं ह्या दोन जिल्ह्यांतल्या लावार्थ्यांचो वांटो 27 टक्के मेरेन आसा अशी म्हायती नागरी पुरवण खात्याच्या वरिश्ठ अधिकाऱ्यान दिली.

गोंयांत वन नेशन वन रेशन येवजेणे खाला 119 महाराष्ट्रांतल्या कार्ड धारकांनी गोंयांत रेशनाचो लाव घेतला. तातूंतले सगल्यांत चड 69 लावार्थी हे दक्षीण गोंयांतले जाल्यार 50 लावार्थी हे उत्तर गोंयांतले आसात. महाराष्ट्र राज्यांतल्या 37 जिल्ह्यां मदले 26 जिल्ह्यांतले लोक वन नेशन वन रेशन येवजणेचो लाव घेतात. हातूंत यवतमाळ, लातूर, जळगांव, नांदेड, बीड, अकोला, अहमदनगर ह्या पयसुल्ल्या जिल्ह्यांतल्या लोकांचो आस्पाव आसा.

सगल्यांत चड 18 रेशन कार्ड धारकां सयत सिंधुदुर्ग जिल्हो पयले सुवातेर आसा. उपरांत 15 कार्ड धारकां सयत कोल्हापूर जिल्हो दुसरे सुवातेर आसा. जाल्यार 9 कार्ड धारकां सयत सोलापूर जिल्हो तिसरे सुवातेर आसा.

मजगतीं, रत्नागिरी आनी वडाळा जिल्ह्यांतले दरेकी 7 कार्ड धारक. बुलढाणा, कांदिवली (मुंबय), पुणें, सांगली, सातारा आनी ठाणें जिल्ह्यांतले दरेकी 5 कार्ड धारक. अकोला, बीड आनी नांदेड जिल्ह्यांतले दरेकी 4 कार्ड धारक. अंधेरी (मुंबय), जळगांव, लातूर आनी नागपूरचे दरेकी 3 कार्ड धारक. धाराशीव आनी पालघरचे दरेकी दोन कार्ड धारक आनी अहमदनगर, अमरावती, हिंगोली, नाशीक, परळ आनी यवतमाळचे दरेकी एक कार्ड धारक गोंयांत रेशनाचो लाव घेतात.

देशांत खंयूय आसूं आपल्या राज्यांतल्या रेशन कार्डाचो वापर दुसऱ्या राज्यांत करून रेशन घेवपाक मेकळीक दिवपी वन नेशन वन रेशन येवजण केंद्र सराकारान चालीक लायल्या. हे येवजणे खाला खंयच्याय दुसऱ्या राज्यांतलो मनीस गोंया येवन वा गोंयचो मनीस दुसऱ्या राज्यांत वचून आपल्या राज्यांतल्या रेशन कार्डाचो वापर करून रेशन घेवपाक शकता.

फक्त राष्ट्रीय अन्न सुरक्षा येवजणे (एनएफएसए) खाला येवपी एएवाय आनी पीएचएच कार्डा धारकांकच वन नेशन वन रेशनाचो लाव घेवपाक मेळटा. गरिबी रेशे वयर आशिल्ल्या कार्ड धारकांक हे येवजणेचो लाव मेळना. हे खातीर वेगळी नोंदणी करपाची गरज ना. तांणी आपल्या राज्यांतलें कार्ड हाडचें आनी तेच सोसायटींत दाखोवन रेशन घरा घेवन वच्चें अशें अधिकाऱ्यान सांगलें.