भांगरभूंय | प्रतिनिधी
शुभम नायक : ड्रग्स जागृती संबंदांत मार्गदर्शन
भांगरभूंय । प्रतिनिधी
फोंडें : फोंडें म्हालाक ड्रग्साच्या रेवाड्या पसून मुक्त करचो खातीर सगल्यांनी सादूर रावचें, तशेंच आदार करचो अशें उपजिल्होधिकारी शुभम नायक हांणी सांगलें.
फोंडें उपजिल्होधिकारी कार्यालया वतीन ड्रग्स नियंत्रणा संबंदांत म्हाल पांवड्याचेर हालींच उपजिल्होधिकारी नायक हांच्या मार्गदर्शना खाला बसका जाली. ड्रग्साच्या वापराचेर नियंत्रण हाडचे खातीर चालू आशिल्ल्या, अंमलबजावणी आनी जागरुकता उपक्रमाचो एक भाग म्हूण हे बसकेचें आयोजन केल्लें. ह्या वेळार मार्गदर्शन करतना नायक उलयताले.
आंतर विभागीय समन्वय घटमूट करचे खातीर पुलीस विभाग, शिक्षण संचालनालय, समाज कल्याण संचालनालय, बंदरां, भलायकी सेवा, अन्न आनी वखदां प्रशासन, उत्पादन शुल्क, येरादारी, विभागीय शेतकी कार्यालय, गोंय राज्य एड्स नियंत्रण सोसायटी आनी फोंड्याचे मामलेदार कार्यालयाच्या अधिकाऱ्यांनी बसकेंत वांटो घेतलो. ह्या वेळार फोंडें पुलीस विभागान हालींचो अंमलबजावणी अहवाल सादर केलो आनी संवेदनशील वाठारांत देखरेख वाडोवपाचें आस्वासन दिलें. भलायकी विभागाक समुपदेशन आनी देखरेख यंत्रणा घटमूट करपाचे निर्देश दिलो. तशेंच एफडीए आनी उत्पादन शुल्क अधिकाऱ्यांक वखदविर्सद तशेंच ड्रग्साचो गैरवापर आडावचे कातीर फार्मसी, बार आनी तावेर्नांची तपासणी खर करपाचे आदेश दिले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
