भांगरभूंय | प्रतिनिधी
विधारी सिरपीक लागून 26 भुरग्यांक मरण
भोपाळ, खबरां संस्था: मध्य प्रदेशांत विखारी सिरपाक लागून 26 भुरग्यांक मरण आयले उपरांत राज्य सरकार आता सुक्ष्म पांवड्यार वखद भेसळीची चवकशी करपाची तयारी करता. पुराय वखदांची तपासणी प्रणाली अपग्रेड करपा खातीर एक प्रस्ताव तयार केला.
जिल्ह्यांत मोबायल लॅब वापरून तपासणी करतले असो दावो करतात. ह्या बदला खातीर सुमार रु. 211 कोटी खर्च अपेक्षीत आसा. राज्य वखदां सुरक्षा आनी नियामक बळकटीकरण येवजणे (SSDRS 2.0) खाला हो प्रस्ताव केंद्र सरकाराक सादर केला. आतां मेरेन वखदां तपासणी भोपाळ, इंदूर, जबलपूर आनी ग्वाल्हेर पुरती मर्यादीत आशिल्ली. तशेंच आतां दरेका जिल्ह्यांत स्वतंत्र वखदां निरीक्षक कार्यालयां स्थापन करतले. हे खातीर 110 कोटी रुपयांची तरतूद केल्या. 50 कोटी रुपयांच्या खर्चान चार राज्यां वखदां प्रयोगशाळांचें अपग्रेडेशन करतले.
एक सूक्ष्मजीवशास्त्र प्रयोगशाळाय स्थापन करतले. आतां मेरेन ज्यो तपासण्यो शक्य नाशिल्ल्यो त्यो थंय शक्य जातल्यो. अधिकार्यांचो असो युक्तिवाद आसा, हाका लागून सगल्या वखदांचें गुणवत्ता नियंत्रण आनी जतनाय घेवप घटमूट जातलें.
दरेका जिल्ह्यांत वखदां निरीक्षकांचे स्वतंत्र कार्यालय
वखदांची तपासणी करपा खातीर आतां दरेका जिल्ह्यांत वखदां निरीक्षकां खातीर एक स्वतंत्र कार्यालय स्थापन करतले. सध्या, ल्हान जिल्ह्यांनी, वखदां निरीक्षक सुवात उपलब्ध आशिल्ल्या हेर कार्यालयांनी आसात. नव्या कार्यालयांनी आधुनीक आयटी प्रणाली, सर्व्हर, संगणक आनी प्रशिक्षण हॉल सयत सगल्यो गरजेच्यो सुविधायो आसतल्यो.
वखदां तपासणी, परवाने आनी अहवाल प्रक्रिया ऑनलायन करतले. हाका लागून वखदांचेे नमुने घेवप, सांबाळ करप आनी तपासणी करप बेगोबेग जातलें. वखदां निरीक्षकां खातीर नव्या पदांची भरती करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
