नरकासूराच्यो बोबो, हुयेली….

भांगरभूंय | प्रतिनिधी

आवाजाक धर्म, सणा कडेन जोडचें न्हय, फक्त ताचे वायट परिणाम पळोवचे!!

गोंयांत नरकासूर देवा परस म्हान जाला. हालींच्या कांय वर्सांनी कृष्णाचो पुतळो वा एक कलाकार कृष्ण जावन नाचता. पूण कार्यावळींत थातोमाथो, अपुरबाय जाता ती नरकासूराचीच. गोंयकारांचे कलेक संद मेळटा, नवें कितें तरी शिकपाक मेळटा. भुरग्यांची उमेद भागता, ही गजाल खरी. हो कलाकार घडोवपी उत्सव. मात, कांय जाणांक सोऱ्याचें वेसन लागता, थोडे लोकांक त्रास करतात. अर्थांत सणाच्या निमतान कितें करचें, कितें ना, हें दरेकल्यान थारावपाचें! नरकासूरा वेळार आनीक एक गजाल घडटा, ती म्हणल्यार आवाजाचें प्रदुशण. आवाज कितलो व्हडलो? पर्वरे बाजारांत लायल्यार सांत इनेझ आयकूंक येतलें. लागींची इमारत थरथरता, धडधडटा. ल्हान भुरगीं, जाण्टे, दुयेंती, मोनजातीक कितें भोगचें पडटा, तें तांकांच खबर. कोणाच्यो भावना दुखपाक नाका म्हूण 12 वरां मेरेन डीजे, लेझर लायट, व्हडल्या आवाजाक पुलीस परवानगी दितात. मात वेळाचें बंधन पाळपाक तांकां अपेस येता.
होंडा आनी पणजे दोन घडणुकांक लागून पुलिसांनी वळेरेन 10 जाणांक (हातूंत सरपंच, पंच आसात.) ताब्यांत घेतल्यात, 19 जाणां आड गुन्यांव नोंद केला. कितें जालें थंय? होंडा रातभर आवाज येता म्हूण एकल्यान पुलिशेंत कागाळ केली. कारवाय जाली. तेन्ना कागाळ करप्यांचें नांव कळिल्ल्यान चोंबो पुलीस चौके भायर जमलो आनी त्या मनशाक जाहीर माफी मागपाक लायली. त्या वेळार कांय अतिउत्साही तरणाट्यांनी ताचे गाडयेंत माराण पेटयले. गाडी लासली. पणजे नेवगीनगरांत नरकासूरा वेळार संगीत बंद करपाक गेल्ल्या पुलिसांक धक्काबुक्की केल्ल्याचो आनी गाळी संविल्ल्याचो आरोप आसा. ह्या दोनूय प्रकरणांचें मुखार कितें जातलें तें पळोवपाचें. ख्यास्त जाता काय शिटकावणी दिवन सोडटात ते. कारण लोकप्रतिनिधी हस्तक्षेप करपाची चड शक्यताय आसा. आतां मेरेन व्हडलीं प्रकरणां पोल जाल्यांत, हें तर किरकोळ! विशेश म्हणल्यार, कागाळ करपी बिगरहिंदू न्हय.
दिवाळे वेळार फोग मारपाक, रातभर आवाज करपाक कोणे विरोध केल्यार ताका ‘हेर धर्माचे लोक आवाज करतात, तेन्ना तुमी न्हिदतात मरे. आतां हिंदूंचे सण आयले काय तुमकां जाग येता’, अशे तिडयतात. ह्या विरोध करप्यां मदीं कडवे हिंदूनिश्ठ लोक आसात, हाचोय सगल्यांकूच विसर पडटा. आवाजाक, फोगाक धर्म, जात, पंथ लागना. म्हणटकच सगल्यांकूच ताचो त्रास जाता. (मात, तरीय भोवतेक जाण फोग मारतात. आवाजाचें प्रदुशण करतात.) गोंयांत फाटल्या 25- 30 वर्सांच्या काळांत दिवाळेक फोग मारप सुरू जालां. ही मुंबय, पुण्याची पद्दत. गोंयांत कोण फोग मारिनाशिल्लो. सरकारान आतां कडक पावलां उखलूंक जाय. फुडले दोन म्हयने दर्यावेळांचेर बोवाळ आसतलो. नातलां, नव्या वर्सा फोग, पार्ट्यो जातल्यो, थंयूय हवा, आवाजाच्या प्रदुशणाचीं, वेळाचीं बंधनां घालपाक जाय. आसगांवां पार्टी चलता जाल्यार त्या रिसोर्टा पुरतो तो आवाज आसचो, थियेकारांच्या कानार तो कित्याक पडपाक जाय?
70 डेसिबला परस चड सतत आवाज जाता, ताका आवाजाचें प्रदुशण म्हणटात. दर्यावेळांचेर आवाज 80 ते 100 डेसिबल आसता. आवाजाच्या प्रदुशणाक लागून आयकुपाची शक्त उणी जाता. ताण वाडटा, झेम येना, तकली फोडटा. काळजाचे ठोके, रक्तदाबाचे परिणाम जाता. विद्यार्थी, गाडी चलोवप्यांचें लक्ष लागना. किरकीर, पिरपीर वाडटा. सुकण्यांक घोंटेर सोडून वच्चें पडटा. पोंशिल्ले, रानवटी प्राणी भियेतात, आबूज जातात. जांचे कडेन सुणें, माजर आसा, तांकां हें खबरूच आसतलें. वाट मेळत थंय धांविल्ल्यान अपघात जावं येता. ते कोणाचेर हल्लोय करुंक शकतात.
खरें म्हणल्यार गोंयांत सायलंट झोन तयार करुंक जाय. आवाजाचें प्रदुशण करप्यांक दंड जाय, परवाने रद्द करचे. आवाजाक धर्म, सणा कडेन जोडचें न्हय, फक्त ताचे वायट परिणाम पळोवचे!!