राजन आनी संजय कोरगांवकार हांचे बॅनर उडयले पिंजून
भांगरभूंय | प्रतिनिधी
पेडणें मतदारसंघांत वेंचणुकेचें वारें लागलें व्हांवंक
पेडणें: पेडणें मतदारसंघांत दिवाळेच्यो शुभेत्सा दिवपा खातीर मिशन फॉर लोकलचे संस्थापक राजन कोरगांवकार आनी समाजसेवक डॉ. संजय कोरगांवकार हांणी पेडणें बाजारांत तशेंच पेडणें मतदारसंघांत लायिल्ले कटआवट तशेंच बॅनर समाजविद्वाट्यांनी सोमारा रातीं उसरां पिंजून उडयले. ह्या पिंजून उडयिल्ल्या बॅनराची पेडणें मतदारसघांत सद्या बरीच चर्चा सुरू आसा.
2027चे विधानसभा वेंचणुकेक अजून देड वर्सां उरलां. मगो पक्षा वतीन फाटले विधानसभा वेंचणुकेंत पेडणें मतदारसंघांतल्यान वेंचणूक लडयिल्ले मिशन फॉर लोकलचे उमेदवार राजन कोरगांवकार हांकां सुमार साडेणव हजार मतां पडून दुसरे सुवातेर आयिल्ले. राजन कोरगांवकार हांणी पेडणें बाजारांत तशेंच पेडणें मतदारसंघांत लायिल्ले दिवाळेच्यो शुभेत्सा दिवपी बॅनर आनी कटआवट कांय समाजविद्वाट्यांनी सोमारा रातीं उसरां पिंजून उडयलें.
तशेंच पेडणें मतदारसंघांतल्यान आपूण येता ती विधानसभा वेंचणूक लडयतलो अशें जाहीर केल्ले समाजसेवक डॉ. संजय कोरगांवकार हांणी पेडणें बाजारांत दिवाळेच्यो शुभेत्सा दिवपी कटआवट आनी बॅनर लायिल्ले. सोमारा रातीं समाजविद्वाट्यांनी हें बॅनर पिंजून उडयले. ताका लागून पेडणें मतदारसंघांत हे विशीं बरीच चर्चा सुरू आसा. हे चर्चेंतल्यान येता ती विधानसभा वेंचणूक बरीच रंगतली अशें काय अणभवी राजकर्त्यांनी उलोवन दाखयलें. पेडणें मतदारसंघांत आतां सावनूच विधानसभा वेंचणुकेचें वारें व्हांवंक लागिल्ल्याचें दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
