भांगरभूंय | प्रतिनिधी
रोहन खंवटेः भितरल्या रस्त्यांचेर येरादारी घुंवडायल्यार जातलो गोंदळ
पणजीः पर्वरे फ्लायओव्हराच्या कामांत येरादारीच्या गोंदळाक लागून प्रकल्प पुराय जावपाक कळाव जाला. मुखेल म्हामार्ग बंद दवरून पर्वरेच्या भितरल्या रस्त्यांचेर येरादारी घुंवडावप शक्य ना. देखून म्हामार्गा देगेकूच पर्यायी रस्ते बांदप हाचेर विचार चालू आसा अशें पर्यटन मंत्री तशेंच थळावे आमदार रोहन खंवटे हांणी सांगलें.
रोहन खंवटे हांणी पर्वरेच्या फ्लायओव्हराच्या कामाचो नियाळ घेवपा खातीर संबंदीत खात्याच्या अधिकाऱ्यांची पर्वरे मंत्रालयांत बसका घेतली. बसके उपरांत खंवटे बसकेची म्हायती दितना पत्रकारां कडेन उलयताले. ह्या वेळार उपसभापती आनी म्हापशेंचे आमदार ज्योशुआ डिसोझा आनी उत्तर गोंय जिल्होधिकारी अंकीत यादव हाजीर आशिल्ले.
आमी ट्रायल तत्वाचेर येरादारी वेवस्थापना खातीर सुचोवण्यो दिल्ल्यो. पूण त्यो उपेगी थारूंक नात. येरादारी सुरळीत चलची हे खातीर राष्ट्रीय म्हामार्ग आनी राज्य म्हामार्ग हांणी एकठांय येवन भौशीक बांदकाम खात्यान काम करपाक जाय अशें मत खंवटे हांणी मांडलें.
ऑक्टोबर, नोव्हेंबर आनी डिसेंबर ह्या म्हयन्यांत पर्यटकांची संख्या वाडटली. पर्यटक तशेंच हेर प्रवासी उत्तर आनी दक्षीण गोंयांत वचपा खातीर ह्या म्हामार्गाचो वापर करतात. पूण फ्लायओव्हराचें काम सुरळीत जावचें हे खातीर नवो ओडीपी रस्तो ते ओ कोकेरो जंक्शन आनी शिवाजी रोड जंक्शन मेरेनचो रस्तो बंद करपाचें थारायलां अशें खंवटे हांणी सांगलें.
पूण हो विशय सारको सुटावो जावंक नाशिल्ल्यान फाटले 10-15 दीस जाले आमदारांक लोकांचे फोन येवपाक लागल्यात. देखून येरादारी सुरळीत जावची हे खातीर नवे जोड रस्ते तयार करप, पार्कींग झोनाचेर येरादारी सुरू करप आनी भितरले रस्ते दुरूस्त करपाचेर भर दिवपाक जाय. जिल्होधिकाऱ्यान हे विशीं नियाळ घेतला अशी म्हायती खंवटे हांणी दिली.
हे विशींची फुडली येवजण आंखपा खातीर म्हापशेंचे आमदार ज्योसुआ डिसोझा हांचे सयत ओडीपी रस्तो ते पर्वरे बाजार मेरेनच्या रस्त्याची पळोवणी करतले, आनी ह्या रस्त्याचो कसो विस्तार करूं येता हे विशीं निर्णय घेतले अशें खंवटे हांणी सांगलें.
आरजी हॉस्पिटला भायर व्हडलो फुटपाथ आसा. सद्या तो फुटपाथ काडचो पडटलो. कुशीक आशिल्लें पार्कींग काडचें पडटलें. तातूंत दोन लेनी बसतल्यो. जयभुवन बिल्डिंगे कुशीक रस्तो आसा थंय आनीक दोन लेनी सुट्टात. हे खातीर लोकांचें सहकार्य तशेंच येरादारी पुलीस आनी भौशीक बांदकाम खात्याक हातांत हात घालून काम करचें पडटलें अशें मत रोहन खंवटे हांणी उक्तायलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
