भांगरभूंय | प्रतिनिधी
हालींच फोंड्यां जाल्ले एके कार्यावळींत आमचे खासदार विरियोतबाबान म्हणलें, भायल्यान येवन गोंयांत रावप्यांचेर निर्बंध येवंक जाय. हालींच कोणे तरी सोशल मिडियाचेर मडगांव रेल्वे स्टेशना वयलो एक व्हिडियो घाल्लो. हजारांनी लोक रेल्वेंतल्यान देंवन शारांत वताले. त्या वेळार म्हाकाय दिशिल्लें ह्या इतले संखेन गोंयांत येवप्यांचेर निर्बंध येवंक जाय. पूण रोखडोच विचार आयलो जर ह्या लोकांचेर अशे निर्बंध आयले जाल्यार गोंयकार जगूंक पावतले? हे लोक गोंयांत येतात कित्याक? ते काय फोल्गां मारूंक हांगा येनात. ते काम सोदूंक येतात. गोंयांत भरपूर काम आसा पूण तें काम करपी लोक नात हें तांकां कळ्ळां. तें काम सहजतायेन मेळटा आनी ताचे खातीर भरपूर दिसवडोय मेळटा हें तांकां कळ्ळां. आमकां कामाक मनीस जाय आनी तांकां काम जाय, मागीर तांचेर निर्बंध कशे घालपाचे आनी कित्याक?
रेल्वेंतल्यान जे हजारांनी लोक आयले ते केन्ना आयले पळयात. नुस्तें मारपा वेली बंदी सोंपली आनी भोव संख्येन हे लोक येवंक लागले. तशे हे लोक नवे न्हय. हे हांगाच काम करपी आनी वर्सांतल्यान एकदांच आपल्या गांवांक परतुपी. दोनेक म्हयने गांवांत रावन काम सुरू जावचे वेळार ते परततात. आमकां तांची गरज. तांचे बगर आमचें काम मुखार वचना. ते जर परतले नात जाल्यार ट्रोलर दर्यांत वच्चे नात. नुस्तेमारी सुरू जावची ना. आमचे लोक काय असलें काम करिनात. गोंयांत तरी करिनात. गोंया भायर ते कसलींय कामां करतात. म्हणटकूच भायल्यांक आमकां वेंग मारचीच पडटा.
विरियोतबाबबान जरी कितलेंय म्हणलें हांचेर निर्बंध येवंक जाय म्हूण तरी तें शक्य जायत अशें दिसना. जर भायल्यान येवप्यांचेर निर्बंध हाडचे जाले जाल्यार पयलीं भायर वचप्यांचेर निर्बंध हाडचे पडटले. जे लोक दुबय, कुवेट, लंडन बी वतात तांकां गोंयांत दवरचे पडटले. हे लोक भायर वतात म्हणून तर गोंयांत पोकळी निर्माण जाता आनी ती पोकळी भरून काडूंक हे भायले लोक गोंयांत येतात. आमच्या गोंयकारांक कश्टाचीं कामां नाकात. सगलेच सरकारी नोकरेच्या फाटल्यान लागल्यात. नोकरी मेळना जाल्यार ते बेकार भोंवतले पूण कश्टाचें काम करचे नात. एक तर सरकारी नोकरी नासल्यार देशा भायर नोकरी दोनूच पर्याय तांचे मुखार. ते खातीर घरांत आशिल्लें भांगर शिंगर कोणाचे तरी भकीक घालूंक ते तयार.
हाचो लाव ह्या भायल्या लोकांक जाता. आयज खंयूय वचात, घरांत काम करपी वावराडी नेपाळ, बिहार वा झारखंडची आसतली. सकाळीं पोंक पोंक आवाज करीत वर्सूयभर लोकांक पाव वांटपी पदेर आतां गोंयकार उरूंक नात. तेय आंध्र प्रदेश वा बिहारी मेळटले. ते पाखले गेले आनी ते पयलींचे गोंयकार पदेरूय गेले. आतां हांचेर निर्बंध हाडल्यार गोंयकारांक पाव कोण खावयतले? दारांत माथ्यार नुस्त्या पांटें घेवन येवपी यान्नी दिसतात आतां? बाजारांत तरी नुस्तेकार आसात ते गोंयकार? ते केन्ना पासपोर्ट घेवन लंडनाक गेले. मागीर नुस्तें खायऱ्यांचें कितें? कोणे तरी नुस्तें विकचेंच पडलें ना? दारांत नुस्तें घेवन येतात ते शिवराक लोक. वाराणशींतल्यान आयिल्ले हे शिवराक लोक नुस्तें विकूंक भोंवतात. तांणी नुस्त्याचीं नांवां लेगीत बदल्ल्यांत. बांगडी, सुंगटी, तारली असलीं नवीं नांवां आमी सद्याक शिकतात. हाका जबाबदार आमीच न्हय? आमकां जेन्ना कामाची लज दिसूंक लागली आनी आमी कश्टाचीं कामां सोडून सरकारी शिर्विशे फाटल्यान लागले वा पासपोर्ट करून भायर वचूंक लागले तेन्ना आनीक वेगळें कितें घडटलें?
इतल्यान सोंपूंक ना. आमचे प्लंबर झारखंडचे, इलेक्ट्रिशियन गुजरातचो, पेंटर, गवंडी, कार्पेंटर सगलेच भायले. दुदकार, फळां-भाजयो विकपी सगलेच भायले. गोंयकारांनी धंदे सोडले आनी तें रितेपण भरून काडूंक हे लोक गोंयां पावले. हांचेर जर आमी निर्बंध हाडले जाल्यार आमच्यो दीसपट्ट्यो कश्यो भागोवपाच्यो? बरें ते गोंयांत येतकूच तांकां कुडी भाड्यान कोण दितात, गोंयकारूच मूं? गोंयकार ह्या रुपान जोडटात न्हय मागीर तांचेर निर्बंध घालपाच्यो खबरो कित्याक करतात? म्हाका ह्या लोकांची मजाच दिसता. हांकां भायले लोक गोंयांत आयिल्ले नाकात. पूण तांकां येवकार तेच दितात. आपले धंदे तेच तांच्या सुवादीन करतात. तांकां जागे कोण विकतात? नीज गोंयकारूच न्हय? आनी तेच उपरांत तांच्या नांवान शिगमो करतात. ते जे तरेन काम करतात तशें काम करूंक गोंयकारांनी शिकचें पडटलें. आमचे कडेन काम जायना म्हणून आमचीं शेतां पडींग उरल्यांत. आमकां शाकभाजी आयात करची पडटा. आमचे कडेन राखणे नात म्हणून गोरवां रस्त्यार भोंवतात. आमकां जाय आशिल्लें दूद-तूप आमी भायल्यान हाडटात.
गोंयांत आतां एकूच धंदो चलता तो म्हणल्यार जाणट्यांनी सांबाळून दवरिल्ल्यो जमनी विकून दुडू करपाचो. स्वता कडेन जमीन आसूंक जाय अशें ना. कोणाचीय जमीन आपली म्हणून विकपाक आमी फिशाल जाल्यात. आतां ह्यो जमनी कितले तेंप उरतल्यो आनी हे दुडू कितलो तेंप चलतले तें कळना. उपरांत कितें? नवी जमीन तयार जायना हाची जाण आमी दवरूंक जाय आसली. आमच्यो जमनी आमचे मुखा वेले पिळगेक मेळटल्यो म्हणपाचें पळोवंक जाय आसलें. पूण तशें केल्यार पयशे कशे मेळटले? कश्ट करिनासतना जगपाची सवंय जातकूच आनीक कितें जातलें? आमी पयलीं काम करचें पडटलें आनी ते खातीर भायर वचपाचेर पयलीं निर्बंध घालचे पडटले तेन्नाच भितर येवप्यांचेर आपशींच निर्बंध येतले.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
