भांगरभूंय | प्रतिनिधी
फातोड्ड्यां विरोधी पक्षांच्या शक्तिप्रर्दशनाचेर मुख्यमंत्र्यांची प्रतिक्रिया
भांगरभूंय । प्रतिनिधी
पणजीः ‘आपूण स्वताच देव’ ह्या भ्रमांत विरोधकांनी रावचें न्हय. जनता सर्वेसर्वा आसा. आमी कितल्याशाच वर्सां सावन जनतेची सेवा करीत आयल्यात आनी ह्यान फुडें करत रावतले, अशी प्रतिक्रिया मुख्यमंत्री डॉ. प्रमोद सावंत हांणी फातोड्ड्यां विरोधी पक्षांच्या शक्तिप्रर्दशनाचेर दिली.
फातोड्डें मतदारसंघात थळावे आमदार विजय सरदेसाय हांणी घडोवन हाडिल्ले श्रीकृष्ण विजयोत्सव कार्यावळींत विरोधी पक्ष फुडारी युरी आलेमांव, रेव्ह्युलेशनरी गोवन्स पक्षाचे मुखेली मनोज परब आनी गोवा फॉरर्वडाचे अध्यक्ष विजय सरदेसाय हांणी एकठांय येवन नेटान शक्ती प्रदर्शन दाखयल्ले. ही एकी पळोवन सत्तेत आशिल्ल्या नरकासुरांक उजो लागलां, असो थोमणो मनोज परब हांणी मारिल्लो.
हे विशीं जाप दितना मुख्यमंत्री डॉ. प्रमोद सावंत हांणी सांगले, कोण नरकासूर आनी कोण देव हें विरोधकांनी पयली सांगचें. स्वतःक जर ते देव म्हणटात आसात जाल्यार तांचेनी त्या भ्रमात रावचे न्हय. हांगासर जनता ही सर्वेसर्वा आसा आनी गोंया खातीर जे किते करपाक जाय ते आमी केलां आनी ह्यान फुडे करत रावतले. आमी जनतेचे सेवक आसात. जर आमकां नरकासुर म्हणून ते स्वताक देव बी समजतात जाल्यार ते भ्रमात आसात, अशी परती जाप मुख्यमंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
