भांगरभूंय | प्रतिनिधी
ख्रिस्तियानो रोनाल्डो गोंयांत येवंक ना
पणजीः निमाणी अधिकृत घोशणा जाली. ख्रिस्तियानो रोनाल्डो गोंयांत खेळचो ना. सावदी अरेबियाच्या अल-नासर पंगडाचें विमान काल रातीं मोपा देंवलें. मात पुर्तुगालाचो हो दिग्गज खेळगडो पंगडा वांगडा येवंक ना.
फाल्यां, बुधवारा फातोड्डें स्टेडियमाचेर एफसी गोवा आनी अल-नासर हांचे मदीं एएफसी चॅम्पियन्स लीग 2 ची मॅच जातली. रोनाल्डो नासलो तरी सादियो माने, जुआंव फेलिक्स आनी इनिगो मार्टिनेज सारके खेळगडो हे मॅचींत बरी कामगिरी करतले, अशें तांच्या कोचाक दिसता.
एफसी गोवा आड अल-नासर मॅचीची घोशणा जाले उपरांत रोनाल्डोक प्रत्यक्ष खेळटना पळोवपाची हजारांनी फॅन्सांक उमेद आशिल्ली. पूण एफसी गोवान परतून परतून विनवणी करून लेगीत रोनाल्डो भारतांतली मॅच खेळचो ना अशें क्लबान जाहीर केलां.
हाचे आदीं एफसी गोवान आदले एएफसी कप विजेते अल सीब हांकां हारोवन पात्रताय मेळयल्ली. तांकां अल-नासरच्या बरोबर गट डीं त सुवात मेळ्ळ्या.
प्रवेशाची वेवस्था
बुधवारा व्हडा संख्येन लोकांची गर्दी जातली. हाचे खातीर एफसी गोंयचे सीईओ रवी पुश्कर हांणी थळाव्या अधिकाऱ्यां कडेन समन्वय करून सुरक्षा आनी प्रवेशाची वेवस्था जाहीर केल्या.
ह्या मॅची खातीर स एंट्री गेट आसतल्यो…
गेट 1: व्हीव्हीआयपी आनी व्हीआयपीं खातीर
गेट 4: मिडिया आनी वेस्ट अप्पर स्टँड
गेट 5: नॉर्थ अपर आनी लोअर
गेट 6: ईस्ट लोअर
गेट 8: ईस्ट अपर, सावथ अपर आनी लोअर, तशेंच वेस्ट लोअर स्टँड
पार्किंग झोन
‘वी फॉर फातोड्डें’ मैदान, डॉन बॉस्को पार्किंग, एसजीपीडीए लॉट, एसएजी जॉगर्स पार्क, स्विमिंग पूल मैदान आनी रवींद्र भवन हांगा पार्किंग झोन केल्यात. मिडिया खातीर फातोड्डें इगर्ज, व्हीआयपीं खातीर गेट 4 आनी 5 मुखार आनी व्हीव्हीआयपी खातीर स्टेडियमांत भितर पार्किंग सुविधा आसा.
बंदी आशिल्ल्यो वस्तू
पॉवर बँक, सिगरेट, लायटर, सेल्फी स्टिक, नाणीं, टिन कॅन, वाद्यां, धारदार वस्तू, बॅग, कंवचेच्यो बाटली, सत्री, हेल्मेट, सोरो, भायलें जेवण, डीएसएलआर कॅमेरे, मराणे, व्हेप्स आदी वस्तू स्टेडियमांत हाडपाक बंदी आसा.
दरेका प्रेक्षका कडेन प्रत्यक्ष तिकेट आसप सक्तीचें. तिकेटीचो मोबायल स्क्रीनशॉट वा ई- तिकीट मान्य करचे नात अशें पुश्कर हांणी सांगलें. तिकीट पयलीं बुक माय शो आपसेवक आनी मागीर पुलीस आनी खाजगी सुरक्षा कर्मचारी तपासतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
