भांगरभूंय | प्रतिनिधी
(आमच्या कार्यावळींची थंय अमेरिकेक तयारी जाल्ली. अमेरिकक जोडुनच फुडें कॅनडाची 15 दिसांची कार्यावळ थरिल्ली…. आतां मुखार)
व्हिजा न्हयकारतकच आमी रेल्वेन नागपूराक परतलीं, पूण जाल्ल्या प्रकारान मिलिंद खूबच उचांबळ जाल्लो. त्या खातीर आमकां व्हिजा नाकारलो म्हण दिल्लें पत्र घेवन तो आनी ताचो इश्ट राजेंद्र, ‘लोकसत्ता’चे संपादक कुमार केतकर हांचे कडेन गेले. तांणीं तांच्या हेर कांय पत्रकार इश्टां कडेन संपर्क केलो. मागीर दुसऱ्याच दिसा कांय मराठी आनी इंग्लिश दिसाळ्यांत ही मोटी बातमी छापून आयली. तातूंत व्हिजा नाकारिल्ल्या खातीर कडक टिका केल्ली. जाका सरकारान ‘ पद्मश्री ’ दिल्या अशा व्यक्तीक व्हिजा नाकारप हो सरकाराचो अपमान, अशेंय तातूंत छापिल्लें. आमच्या फाटल्यान मुंबयत कितें जालां, हाची आमकां कांय कल्पनाच नासली. पूण खबरांपत्रांत आयिल्ल्या बातम्यांक लागून अमेरिकेच्या कॉन्सुलेट जनरलाक आपणें केल्ली चूक कळ्ळी. ताणें रातींच आमकां ई- मेल केली. हांव आनी मंदा प्रवासांत आसलीं. दिगंत फांतोडेर काम सुरू करचे पयलीं ई-मेल पळयता. ताका लागून ताणें ती पळयली. ताणें फांतोडेर पांचाक म्हाका फोन केलो, की कॉन्सुलेट जनरलाची ई- मेल आयल्या. ताणीं तुका पासपोर्ट घेवन परत आपयला. हांवें सांगलें,” आमी तर आतां नागपूरा लागीं पावल्यांत. मागीर पळोवया कितें करप तें. तूं कांयच जाप धाडनाका.”
सकाळीं आठांक सुमार कॉन्सुलेट जनरलाचो म्हज्या मोबायलाचेर कॉल आयलो. ‘ व्ही रिेग्रेट द मिस्टेक. तुमी परत येयात.’ हांवें म्हणलें, आमी आतां नागपूरा मेरेन पावलीं. मुंबयच्यान हें अंतर खूब पयस आसा. परत येवप आतां शक्य ना. तातूंत म्हजी अर्थिक स्थिती बरी ना. ह्याच कारणां खातीर तर तुमी म्हाका व्हिजा न्हयकारला. परत यो- वच करपाक म्हाका कशें परवडटलें ?’ तो बरोच मोव पडलो.
‘ कोणाक तरी पासपोर्ट घेवन धाडात ’ अशें म्हणपाक लागलो. आमचो पासपोर्ट मुंबयतच आसलो. कॅनडाच्या वकिलातीन आमकां व्हिजा दिल्ल्यान आमी कॅनडाक वतलींच आसलीं. त्या खातीर तो थंयच दवरिल्लो. मागीर मिलिंदाक फोन करून सगळो प्रकार सांगलो. मिलिंद अमेरिकन कोन्सुलेटींत तांणीं दिल्ल्या वेळार आमचो पासपोर्ट घेवन गेलो. आतां तांणीं आमकां पुराय धा वर्सांचो व्हिजा दिलो. खबरांपत्रांनीं हें प्रकरण उजवाडांत हाडलें ताचो हो परिणाम आसलो. दिसाळ्यांत आयिल्ल्यो बातम्यो वाचून जायत्या जाणांनी कोन्सुलेटींत ई-मेल, पत्रां धाडून निशेध केल्लो.
अमेरिकेच्या ह्या दौर्यांत आमी वीस कडेन गेलीं. विंगड विंगड गांवांत वेगवेगळ्या लोकांगेर रावलीं. तांणीं खूब बरी सरबराय केली. सुटयेच्या दिसा जाता तितलें भोंवडायलें. ह्या दौऱ्यांत आमकां गायतोंडे सारके इश्ट लाबले. ताणीं शाळे खातीर भरपूर मजतय दिली. फुडें कॅनडाकय गेलीं. ह्या दौऱ्यांत हॉस्टेला खातीर एकदम मोटी देणगी मेळ्ळी. ताका लागून त्याय अर्थान ही आमची वारी यशस्वी जाली.
त्या उपरांतय जायते कडेन आमंत्रणां येत रावलीं. पुरस्कार मेळत रावले. वेगवेगळे तरेन लोक फाटल्यान उबे रावले. आमचें काम व्यापक पातळेर जगा मेरेन पावलें. तातूंतल्यान लोकांचें आनीक प्रेम मेळ्ळें. म्हाका- मंदाक पुरस्कारांचें बी कांय कवतुक ना. पूण ह्या पुरस्कारा खातीर आमच्या कामांक समाजमान्यताय मेळत आसा, हाचें समाधान मात खूब आसा.
(मुखार चलता)
प्रकाशवाटा (मूळ लेखक : डॉ. प्रकाश आमटे)
देविदास गजानन नायक
98505 35051
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
