भांगरभूंय | प्रतिनिधी
रुद्रेश्वर देवस्थान आनी रथयात्रा समितीचे शोकसभेंत सूर
भांगरभूंय । प्रतिनिधी
दिवचल : भंडारी समाजांतल्या भावांनी आपापसांतले मतभेद विसरून सगल्यांनी संघटीत जावन समाजाचो वावर आनीक नेटान फुडें व्हरचे खातीर वावुरचें. हीच आमचे पात्रांल आदले मुख्यमंत्री आनी मंत्री रवी नायक हांकां खरी आर्गां थारतली, असो सूर हरवळ्या रवी नायक हांकां आर्गां ओंपचे खातीर आयोजीत केल्ले शोकसभेंत साबार मानेस्तांनी उक्तायलो.
रुद्रेश्वर देवस्थान समिती आनी रथोत्सव समिती वतीन रुद्रेश्वर देवस्थान वाठारांत आयोजीत केल्ले शोकसभेक गोंयांतल्या विवीध वाठारांतल्यान रवी नायक हांकां आर्गां ओंपचे खातीर तांच्या चाहत्यांनी मुजरत हाजेरी लायिल्ली. आदले आमदार किरण कांदोळकार, आदले मंत्री दिलीप परुळेकार, आदले सभापती, नरहरी हळदणकार, फुडारी अमीत पालेकार, उपेंद्र गांवकार, देवस्थान अध्यक्ष यशवंत माडकार, सुभाष किनळकार, संगेश कुंडयकार, दीपक नायक, किशोर नायक, तारक आरोलकार, श्रीकृष्ण हळदणकार, काशिनाथ मयेंकार, प्रकाश आचरेकार आनी हेर उलोवप्यांनी रवी नायक हांच्या वावराची तुस्त करून तांकां आर्गां ओंपलीं.
किरण कांदोळकार हांणी सांगलें, रवी नायक हे गोंयांतले आदर्श फुडारी आशिल्ले. तांणी मुख्यमंत्री आसतना कूळ मुंडकार विधेयक हाडून सामान्य भोवजन समाजाक व्हड थाकाय दिली. खूब प्रतिभावंत आशिल्ले रवी नायक हे सादें रावप आनी उच्च विचारसरणीचे आशिल्ले. दरेकल्याक वांगडा घेवन वतना तांणी गोंयची धुरा येसस्वी तरेन सांबाळटना गुंडाराज काबार केल्लें. सगल्यांनी हाचे मुखार एकवटान रावून भंडारी समाजाचो वावर आनीक नेटान मुखार व्हरचे खातीर काम करप, हीच तांचे खातीर खरी आर्गां थारतली, अशें तांणी सांगलें.
ह्या वेळार नरहरी हळदणकार, अमीत पालेकार, दिलीप परुळेकार, उपेंद्र गांवकार, यशवंत माडकार, सुभाष किनळकार, दीपक नायक, किशोर नायक, तारक आरोलकार आनी हेर मानेस्तांनी रवी नायक हांच्या विवीध तासांचो उल्लेख करतना तांचे उगडास ताजे करून आर्गां ओंपलीं.
रवी नायर हांणी रथयात्रेच्या माध्यमांतल्यान सुपाय गोंयकारांक देवदर्शन दिवपाची जी भुमिका घेतली ती खुबूच तोखणायेची आशिल्ली. समाज भावांनी संघटीत रावून, मतभेद विसरून एकठांय येवचें, आपलो वावर फुडें व्हरचो हो तांचो हट्ट आशिल्लो. 12 ऑक्टोबराक जाल्ल्या राज्य पांवड्या वयल्या भंडारी समाज भावांच्या सत्कार सुवाळ्याक रवी नायक हांणी हीच भुमिका मांडिल्ली, ताचो उल्लेख लेगीत खूब जाणांनी ह्या वेळार केलो.
यशवंत माडकार हांणी सांगलें, रथोत्सव समितीचे अध्यक्ष आशिल्ले रवी नायक हांणी गोंयांत रथयात्रा काडून, सगल्यांक वांगडा घेवन हो वावर केलो, ताचो उगडास सासणाचो उरतलो.
सुभाष किनळकार हांणी सांगलें, रवी नायक एक आदर्श फुडारी आनी सगल्या घटकांक आपले कशे मानपी परिपूर्ण मनीस आशिल्ले. तांणी आमकां भंडारी समाजाच्या वावरा संबंदांत खूबश्यो गजाली सांगल्यात. कांय दिसांत ते संबंदांत आमी सगल्यो गजाली जाहीर करतले. हाजीर आशिल्ल्या मानेस्तांनी रवी नायक हांच्या फोटवाक फुलांचो हार घालून तांकां आर्गां ओंपलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
