भांगरभूंय | प्रतिनिधी
आदले मुख्यमंत्री रवी नायक हांकां ओपलीं आर्गां
पणजी : रवी नायक हे भोवजन समाजाचे कैवारी आशिल्ले. सगल्या समाजाक एकठांय हाडपाचो तांचो यत्न सदांच याद उरतलो. कुळ-मुंडकार आसूं वा शेतकी मळार तांणी दिल्लें योगदान लोकांच्या कायम लक्षांत उरतलें. शिक्षणीक मळार तांणी व्हड योगदान दिलां, अशें मुख्यमंत्री डॉ. प्रमोद सावंत हांणी आदले मुख्यमंत्री रवी नायक हांकां आर्गां ओपतना म्हणलें.
आदले मुख्यमंत्री आनी शेतकी मंत्री रवी नायक हांकां मंगळारा १४ ऑक्टोबराक मरण आयलें. तांकां आर्गां ओंपपा खातीर राज्य सरकारा वतीन आयज कला अकादमींत शोकसभा जाली. ह्या वेळार महाराष्ट्राचे मुख्यमंत्री देवेंद्र फडणवीस, गोंयचे मुख्यमंत्री डॉ. प्रमोद सावंत, भलायकी मंत्री विश्वजित राणे , केंद्रीय मंत्री श्रीपाद नायक, खासदार सदानंद तानवडे, सभापती गणेश गांवकार, वीज मंत्री सुदिन ढवळीकार, अॅड. नरेंद्र सावयकार, उद्देगपती अवधूत तिंबलो, भाजप प्रदेशाध्यक्ष दामू नायक, आदले मुख्यमंत्री लक्ष्मीकांत पार्सेकार, अॅड रमाकांत खलप, प्रतिमा धोंड हांणी आपलें मनोगत उक्तायलें.
‘जे का रंजले, गांजले त्यासी म्हणे जो आपुले …’ ह्या अभंगा प्रमाण रवी नायक हांणी गांवांगांवांतल्या आनी आवाज नाशिल्ल्या सामान्य मनशां खातीर काम केलें, तांचे खातीर संघर्श केलो. कूळ मुंडकारां खातीर काम करून रवी नायक हांणी दायज निर्माण केलें. तांच्या कामाचें दायज चलोवपाचें काम गोंय सरकार आनी हेरांक करपाचें आसा, अशें मत उक्तावन महाराष्ट्राचे मुख्यमंत्री देवेंद्र फडणवीस हांणी आदले मुख्यमंत्री रवी नायक हांकां महाराष्ट्र सरकार आनी महाराष्ट्राचे जनते वतीन आर्गां ओंपलीं.
तपोभूमी कुंडयचे श्री ब्रह्मेशानंद महाराज हांणी सांगले, रवी नायक हांकां लागून कुडय तपोभूमीचे सप्न पुराय जालें. श्री ब्रह्मानंद स्वामी हांकां दिल्लें उतर रवी नायक हांणी पाळ्ळें. ते खूब देव देव करपी नाशिल्ले, मात जे देवाक मानपी आसात तांचे खातीर काम करपी फुडारी आशिल्ले. रवीचो अस्त जाला अशें म्हाका तरी दिसना. ताचें आपल्या कामा वरवीं दरेक घराघरांनी, दरेके सुवातेर, रवीचें अस्तित्व आसा, अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
