भांगरभूंय | प्रतिनिधी
स्फोट दुर्घटणेंतल्या आनीक एका कामगाराक मरण
भांगरभूंय । प्रतिनिधी
मडगांव : फॅक्टरी आनी बॉयलर खात्यान विजय मरीन शिपयार्ड सील करपाचे आदेश दिल्यात. लोटलेच्या बोट बांदणी प्रकल्पांत शुक्रारा भिरांकूळ स्फोट जावन उजो लागिल्लो. तातूंत शुक्रारा दोगांक मरण आयिल्लें. जाल्यार शेनवारा हे दुर्घटणेंतल्या आनीक एका कामगाराक मरण आयलें. ह्या प्रकरणांत शिपयार्डाचे सुरक्षा अधिकारी राजू बोरा (रा. आसाम) हाका अटक केल्या.
मायणा कुडटरी पुलिसांनी म्हणलां, विजय मरीन वर्कशॉपाचे सुरक्षा अधिकारी राजू बोरा हाणें कामगारांक संरक्षणात्मक उपकरणआं दिवपांत घाळपणां केलीं. तशेंच उजो सुरक्षा उपाय येवजण करपाक अपेसी थारिल्ल्यान कामगारांचे सुरक्षेक धोको निर्माण जालो. ह्या प्रकरणांत ताका अटक केल्या. पुलीस निरिक्षक अरूण गांवस देसाय हांच्या मार्गदर्शना खाला उपनिरिक्षक सागर कामत फुडलो तपास करता.
रासय लोटलेच्या विजय मरीन बोट बांदणी प्रकल्पांत बोट बांदपाचें काम चालू आसतना शुक्रारा सांजेच्या 5.15 वरांच्या सुमाराक स्फोट जालो आनी उजो लागलो. तातूंत सात कामगार जखमी जाले. तातूंतल्या दोगांक चड लाशिल्ल्यान उपचार चालू आसतना मरण आयिल्लें. जाल्यार चार कामगारांचेर जीएमसींत जाल्यार एका कामगाराचेर दक्षीण गोंय जिल्हो हॉस्पिटलांत उपचार चालू आशिल्ले. सगले कामगार अलिबाग (उत्तर प्रदेश) वाठारांतले आसात. ते सध्या वेर्ण्यां रावताले.
बंद टांकयेंत स कामगार जाल्यार एको टांकये भायर आशिल्लो. मोहम्मद बाबूल (25), संतोष कुमार (25), मनिष चव्हाण (26) आनी अभिषेक सिंग (25) हांचेर जीएमसींत उपचार चलताले. शेनवारा सकाळींत तातूंतल्या एकल्याक मरण आयलें. जिल्होधिकाऱ्यान ही घडणूक उज्याची आसा, स्फोटाची न्हय अशें म्हणलां. तशेंच घडणुकेचो अहवाल सादर करपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
