भांगरभूंय | प्रतिनिधी
भावंडांनो,
तुमची सगळ्यांची परिक्षा बी सोंपल्या आनी तुमकां दिवाळेची सुटी पडल्या. फाल्यां दिवाळी. उजवाडाची परब. न्हय फक्त दिव्यांचो उजवाड, तर आमच्या मनामनांत बऱ्या विचारांचो उजवाड फांकूंक जाय. जसो नरकासुराचो वध करून आमी दिवाळी मनयतात, तसोच वायट गजालींक मुळापासून हुमटावन आमी आमच्या जिवितांत बरो उजवाड हाडूंक जाय. ते खातीर आपल्या पालकांचें आयकुवप, शिक्षकांचें आयुकवप आनी घरांतल्या जाण्ट्यांचें आयकुवप भोव गरजेचें.
फाल्यां आमी दिवाळेचो फराळ खावन दिवाळी मनयतलीं. लक्ष्मी पुजनाकय आमी देवा कडेन प्रार्थना करतलीं. मागीर तुळशीच्या लग्नाक तुमी सगळीं मज्जा करतलीं हें हांव जाणां. हें सगळें करतना आपली सुरक्षीतताय सदांच पळोवप गरजेची. फोग मारतकच आमचें वातावरण प्रदुशीत जाता. ताचो त्रास आमच्या भलायकेक जाता. ते खातीर आमी वातावरणाची आनी स्वताची जतनाय घेवप गरजेचें. भुरग्यांनो, हालींच तुमची परिक्षा सोंपली थंय आसा, ते खातीर तुमी दिवाळेची मजा लुटाच, पूण त्याच बराबर फुडल्या परिक्षेचीय तयारी आतांच करपाक लागल्यार तुमकांच ताचो फायदो जातलो.
दिसाक थोडोसो वेळ काडून अभ्यास करात. हातूंतल्यान तुमकांच आत्मविस्वास मेळटलो, समाधान मेळटलें आनी फुडले परिक्षेक बरे गूण घेवंक तुमकां मदत जातली. हांवें तुमकां वयर सांगिल्ले प्रमाण आमकां वायट गजालींचेर मात करपाक जाय. वायट गजाली म्हुणल्यार खंयच्यो आळसाय, जाण्ट्यांचें आयकुवप ना, तांकां परत्यापरतें सांगप, फकत मोबायलाचेरूच खेळप, दुसऱ्यांक दुखोवप…. ह्या सगळ्या वायट गजालींचेर आमी मात करून उजवाडाचे वटेन वचपाक जाय.
फाल्यां सक्काळीं उठून तुमी सगळीं दिवे पेटयतलीं हें हांव जाणां. दिव्यां सारकोच उजवाड तुमच्याय जिणेंत हाडात आनी ही दिवाळी उमेदीन मनयात. तुमकां सगळ्यांक दिवाळेची परबीं… बरें तर भुरग्यांनो, फुडल्या आयतारा मेळया..
उल्हासभाई.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
