गोंयांत दिवाळीचे खरेदीक नेट

भांगरभूंय | प्रतिनिधी

पणजीः दिवाळी खरेदी खातीर शेनवारा पणजी सयत राज्यांतल्या वेगवेगळ्या बाजारांत व्हड गर्दी जाल्ली. बाजारांत आकाशदिवे, पणत्यो, इलेक्ट्रीक लायटींचे सामान, रांगोळी, नरकासूराची मास्क, फुलांच्यो माळा, आनी हेर सजावटींच्यो वस्तू घेवपाक लोकांनी बरीच गर्दी केल्ली. तशेंच गांवठी फोव, सादे फोव, कारटां आदी खाणांची खरेदी करपाकूय बरीच गर्दी जाल्ली. हाका लागून शेनवारा बाजार वाठारां सयत चडशा मुखेल रस्त्यांचेर येरादारीची कोंयडी जाल्ली.
पणजी बाजारांत फाटल्या वर्साच्या तुळेंत वेगवेगळ्या वस्तूंचे दर वाडलां. पूण खरेदीची उमेद मात तशींच आसा. दिवाळे खातीर गरजेचें आशिल्ले गांवठी फोव 100 ते 120 रुपया किल दरान विकतात. सादें फोव 70 रुपया किल विकतात. आनी कारटां 20 रुपया 5 नग आसात. आंबाडे 50 रुपया 10 नग, बत्तासे 30 रुपया 6 गोड नग विकतात.बेसन लाडू 160 रुपया डझन. आनी रव्याचे लाडू 200 रुपया डझन विकतात.
बाजारांतल्या आकाशदिव्याचे दर आकार आनी डिजायनाचेर आदारून 200 ते 1000 रुपया मेरेन आसात. मातयेच्यो साद्यो पणत्यो डझनाक 50 ते 80 रुपया, कलर आनी डिजायन केल्ल्यो पणत्यो 15 ते 40 रुपया एक विकताले. इलेक्ट्रीक लायटीच्यो माळा 200 ते 1500 रुपया. कृत्रिम फुलांच्यो माळा 30 ते 150 रुपया विकतात.

शारांत येरादारीची केंयडी
शेनवारा सांतिनेज, 18 जून, एमजी रस्तो, आझाद मैदान वाठार, बांदोडकर रस्तो हांगा गाडयांची रांक आशिल्ली. पूण चडशे सुवातेर पुलीस गैरहाजीर आशिल्ले. पार्किंगाची वेवस्था नाशिल्ल्यान रस्त्यांचेर गाडयो पार्क केल्ल्यो. हाका लागून येरादारीची कोंयडी जाली.