भांगरभूंय | प्रतिनिधी
उच्च न्यायालयान गोंय सरकाराक दिले निर्देश
पणजी ः गोंय सरकार आनी गोवा लोकसेवा आयोगान सरकारी कर्मचाऱ्यांच्या सेवेंत मुजत वाड करप टाळचें आनी ताचे बदला रिकाम्या पदांचेर तरणाटे प्रतिभेक संद मेळची. अशी घटमूट यंत्रणा तयार करची असो सल्लो गोंयच्या मुंबय उच्च न्यायालयान एका प्रकरणाची सुनावणी करतना दिलो. न्यायाधीश भारती डांगरे आनी आशिष चव्हाण हांच्या खंडपिठान भरती नेमांत बदल करून वा पात्रतायेच्या निकशांत योग्य बदल करून हे उद्दिश्ट साध्य करपाचो सल्लो गोंय सरकाराक दिला.
परत परत मुजत वाड दिवप खेदजनक
भौशीक बांदकाम खात्याचे सहाय्यक अभियंते पंकज नार्वेकार हांणी दाखल केल्ले याचिकेचेर सुनावणी करतना न्यायालयान गंभीर निरिक्षणां नोंद केल्यांत. ह्या अभियंत्यान मुखेल अभियंतो उत्तम पार्सेकार, सुभाष बेळगांवकार, देखरेख अधिकारी सोमा नायक आनी सीवरेज इन्फ्रास्ट्रक्चरल डेव्हलपमेंट कॉर्पोरेशन ऑफ गोवाचे (SIDCGL) वेवस्थापकीय संचालक राजेंद्र कुमार खन्ना हांकां निवृत्ती उपरांत लेगीत परत परत सेवा वाड दिवपाच्या निर्णयाचेर अभियंत्यान हरकत घेतिल्ली. खातें परत परत सेवा वाड दिता, जाका लागून याचिकादारा सारकिल्या कर्मचाऱ्यां मदीं अशी भावना निर्माण जाता की खातें मुद्दाम त्या व्यक्तींक सेवेंत दवरपा खातीर अशें करता. ही एक खेदजनक परिस्थिती अशेंय खंडपिठान नोंद केलां.
बडटी प्रक्रिया थांबयिल्ल्याचो आरोप
उंचेल्या पांवड्यावेल्या अधिकाऱ्यांक सेवा वाड दिवपाक लागून बडटी प्रक्रिया पुरायपणान थांबल्या अशें याचिकादार अभियंत्यान वकील चैतन्य पाडगांवकार आनी एस. काणेकार हांचे वतीन न्यायालयांत सांगलें. तशेंच कनिश्ट पांवड्यावेल्या अधिकाऱ्यांक बडटी दिवपाचे नेम कुशीक दवरून तांकां कार्यकारी अभियंतो आनी अधीक्षक अभियंतो पदांचेर फकत ‘ॲड हॉक’ वा ‘ऑफिशिएटिंग’ पद्दतीन कायम दवरपाक लागल्यात. हे मुद्दाम केल्ल्यान ताका लागून तांकां बडटी मेळोवपा खातीर जाय आशिल्ली ‘नियमित सेवा’ पुराय करपाक मेळना, असो गंभीर आरोप तांणी केलो.
हे विशीं अतिरिक्त सरकारी वकील दीप शिरोडकार हांणी ‘प्रशासकीय सोयी खातीर’ मुजत वाड दिवप गरजेचे अशें स्पश्ट केलें आनी ह्या पदांची कार्यक्षमताय म्हत्वाची आशिल्ल्यान तांची कार्यक्षमताय तिगोवन दवरपा खातीर ही सेवा वाड दितात अशें स्पश्टीकरण दिलें.
मजगतीं, न्यायालयान याचिकादारांची याचिका न्हयकारली तरी गोंय सरकार, राज्य कर्मचारी भरती आयोग आनी संबंदीत खात्यानय भरती नेमाचो नियाळ घेवचो आनी गरज पडल्यार नेम बदलून वा कनिश्ट कर्मचाऱ्यांक शिथीलताय दिवन रितीं पदां भरपाची योग्य यंत्रणा तयार करची अशें सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
