भांगरभूंय | प्रतिनिधी
वाळपयः दिवाळी, दसरो ह्या सारक्या सणां वेळार रोजांच्या (झेंडू) फुलांक व्हड मागणी आसता. हीं फुलां कर्नाटक, तमिळनाडू, महाराष्ट्रांतल्यान आयिल्ल्यान गोंयांत तांची व्हड बाजारपेठ आसा. थळाव्या शेतकारांक रोजांच्या फुलांची लागवड करपाक प्रोत्साहन दिवचें आनी गोंयांत व्हड प्रमाणांत रोजांची लागवड करची. हे खातीर गोंय सरकाराच्या शेतकी खात्यान फुडाकार घेतला. अंदूं सत्तरी तालुक्यांत 70 हजार रोजांच्या फुलांची लागवड जाल्या. हातूंत 43 शेतकारांनी वांटो घेतलां. रोजांची व्हडा प्रमाणांत लागवड करपा खातीर थळाव्या शेतकारांक सहकार्य करपाचो उलो वाळपय शेतकी खात्यान केलां.
70 हजार झाडांची लागवड
वाळपय शेतकी खात्याचें क्षेत्रीय अधिकारी विश्वनाथ गावस हांणी दिल्ले म्हायती प्रमाण, तालुक्यांत वट्ट 70 हजार झाडां लायल्यात. नॅशनल हॉर्टिकल्चर मिशन ह्या येवजणे खाला हातूंत मुखेलपणान 43 शेतकारांनी वांटो घेतलां. योग्य मार्गदर्शना उपरांत लागवड बरी जाल्या. हाका लागून सुमार 2.50 टन परस चड फुलां तयार जातली. हे खातीर वाळपय तशेंच गोंयच्या वेगवेगळ्या सुवातींनी बाजारपेठेची बरी संद आसा. हाका लागून शेतकारांक बरो अर्थीक फायदो जातलो आनी उच्च दर्जाचीं फुलां गोंयकारांक मेळटलीं. कर्नाटक, महाराष्ट्र आनी तमिळनाडूंतल्यान येवपी फुलां कांय दीस पयलींची आसतात. पूण थळाव्या शेतकारांनी पिकयल्लीं फुलां ताजीं आसून तीं कमी दरान नागरिकांक मेळटलीं. कांय शेतकार हीं फुलां 100 ते 120 रुपया किल दरान उपलब्ध करून दितात अशेंय तांणी सांगलें.
वट्ट तीन जातींची फुलां मेळटलीं….
सत्तरी तालुक्यांत फुलां लायिल्ल्या सुवातींनी वट्ट तीन जातींची फुलां मेळटलीं. तातूंत कलकत्ता टेनिस बॉल हळदुवो, कलकत्ता राउंड ऑरेंज आनी अष्टगंधा ऑरेंज अशो तीन जातीं आसात.
सत्तरीची जमीन रोजांच्या लागवडी खातीर पोशक…
सत्तरीची जमीन रोजांच्या लागवडी खातीर खूब पोशक आसा. हे जमनींत हे लागवडी खातीर पोशक तत्वां आशिल्ल्यान हे सुवातेर फुलांची लागवड करप आनी तातूंतल्यान बऱ्या दर्जाचें उत्पादन मेळप शक्य जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
