भांगरभूंय | प्रतिनिधी
नांव नोंदणी करपाचो कोंकणी मोगींक उलो
पणजीः अखिल भारतीय कोंकणी परिशदेच्या 26 व्या अखिल भारतीय साहित्य संमेलनाचे अध्यक्ष म्हणून ज्येश्ठ कोंकणी कवी माधव बोरकार उर्फ वेणीमाधव श्रीधर सिनाय बोरकार हांची एकमतान निवड जाली. परिशदेचे हालींच जाल्ले आमसभेचे बसकेंत हो निर्णय जालो. साहित्य संमेलन 22 आनी 23 नोव्हेंबराक केरळ राज्यांतल्या एर्नाकुलम शारांत ए. जे. हॉलांत जातले.
माधव बोरकार हांणी 1968 वर्सा सावन कोंकणी कवितेच्या मळार व्हड योगदान दिलां. तांचे आतां मेरेन चंवर, वताच्यो सावळ्यो, उजवाडाचो रूख, पर्जळाचें दार, यमन, अव्यक्ताचीं गाणी, सिंफनी, मळबाचें जनेल, सुकृत फुलां सारकिल्ले कविता संग्रह प्रकाशीत जाल्यात. तशेंच तांणी कोंकणी साहित्यीक पांडुरंग भांगी आनी मनोहरराय सरदेसाय हांच्या जिविताचेर पुस्तकां बरयल्यांत. रवींद्रनाथ टागोर हांच्यो कविता कोंकणींत अणकारीत केल्यात. कवितेच्या मळार तरणाट्यांक ते सातत्यान मार्गदर्शन दितात.
माधव बोरकार हांच्या यमन ह्या कविता संग्रहाक साहित्य अकादेमीचो पुरस्कार फावो जाला. तशेंच साहित्य अकादेमी अणकार पुरस्कारुय तांकां फावो जाला. हाचे भायर, कोंकणी भाशा मंडळ, टी. एम. ए. पै पुरस्कार, विश्व कोंकणी केंद्राचो विमला पै पुरस्कार, गोंय राज्य सांस्कृतीक पुरस्कार, गोवा कोंकणी अकादेमी कोंकणी भाशा सेवा पुरस्कार तांकां फावो जाल्यात. तांणी आकाशवाणीचेर स्टेशन संचालक म्हणून वावर केला. ते गोवा कोंकणी अकादेमीचे आदले अध्यक्ष.
नांव नोंदणी करची
साहित्य संमेलनाचें आयोजन करपाची जापसालदारकी केरळांतल्या कोंकणी संस्थांनी संयुक्तपणान घेतल्या. संमेलनाक हाजीर रावूंक सोदपी प्रतिनिधींनी नांव-नोंदणी करूंक सुरवात केल्या. आयोजकांनी दोन रातीं खातीर राबित्याची आनी नाश्तो-जेवणाची वेवस्था केल्या. प्रवास खर्च आनी वेवस्था मात प्रतिनिधींक करचो पडटलो. नांव-नोंदणी करूंक गुगल फॉर्म – https://docs.google.com/forms/d/e/1FAIpQLSf1rSeS_5EXQahSN9moeUwI-uX40zeLIKu8J8WTX3KYTMbgHQ/viewform?usp=header.
चड माहिती खातीर चेतन आचार्य, कार्याध्यक्ष, कोंकणी परिशद हांकां 88301 03768 / 94223 89290 वा स्नेहा सबनीस, सरकार्यदर्शी, कोंकणी परिशद 99236 33789 ह्या क्रमांकाचेर संपर्क करचो, अशें कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
