भांगरभूंय | प्रतिनिधी
चिंतन – 62
तुकोबा म्हणटात –
“होइजेतें शूर त्यागें ।
वाउगें तें सारावें ॥”
म्हणल्यार फट, चुकीचें, वायट हें सोडून दिवन प्रामाणीकपणान जगपी तोच खरो वीर.
शौर्य म्हणल्यार फकत तरसाद हातांत घेवप वा मैदानाचेर झगडप न्हय. खरें शौर्य म्हणल्यार फट मार्गा बदला सत्याचो मार्ग धरून उबो रावप आनी कठीण परिस्थितीक धिरान तोंड दिवप.
टेनिसाच्या इतिहासांतली सगळ्यांत म्हान खेळगडी सेरेना विल्यम्स ही गरीब कुटुंबांतल्यान आयिल्ली. सुरवेक तिका योग्य प्रशिक्षक, सादनां वा कोर्ट लेगीत मेळ्ळें ना. जायत्या जाणांनी फटवणुकेचो मार्ग आनी शॉर्टकट वापरपाचो, पूण सेरेनाक कश्ट आनी प्रामाणीकपणाक प्राधान्य दिलें.
2007 वर्सा तिच्या हाताक गंभीर दुखापत जाल्ली. दोतोरान म्हणलें – ‘खेळप कठीण आसा.’ जायते खेळगडे दुसऱ्या मार्गाचो विचार करताले, पूण सेरेनान कसलीच हांयसां स्विकारूंक ना. तिणें योग्य पुनर्वसन केलें, खर सराव केलो आनी कांय वर्सां उपरांत परतून ग्रॅण्ड स्लॅम जिखली.
तिचो हो प्रवास दाखयता– अडचणी आयल्यो तरी लेगीत चुकीचो मार्ग आपणावंक ना अशें धैर्य म्हणल्यारुच खरें शौर्य.
फुटबॉलांत लायनेल मेस्सीक भुरगेपणांत ग्रोथ हार्मोनाची डिफीसिएन्सी नांवाचें दुयेंस आशिल्लें. ताची उंचाय वाडनाशिल्ली आनी जायत्या क्लबांनी ताका न्हयकार दिलो. कांय जाणांनी ताका बनावट वखदां घेवपाची सुचोवणी केली, पूण मेसी आनी ताच्या कुटुंबान प्रामाणीक मार्ग आपणायलो – योग्य वखद आनी कश्ट.
मैदानाचेरय तो प्रामाणीकपणान खेळटालो. डोपिंग, फटोवप वा नाटक चड करून फायद्याचें थारूंक शकता, पूण मेस्सीन केन्नाच फटीच्या मार्गांचो आदार घेतलो ना. ताच्या सादेपणाक आनी प्रामाणीकपणाक लागून ताका संवसारभर ‘गोट’(बोकडो) म्हणून वळखतात.
संकश्टाच्या वेळार लेगीत प्रामाणीक रावप – सेरेना आनी मेस्सी हांचे मदीं दिसता.
बनावट मार्ग सोंपो दिसता, पूण खरे धैर्य कश्टांत आनी सत्याचेर ठाम उबें रावपांत आसता.
दरेके ल्हान निवडींतूय फट वागपाक ‘ना’ म्हणप – मागीर ती परिक्षा आसूं, नोकरी आसूं, वेवसायीक वा समाजीक जिणेंत आसूं.
तुकोबा आमकां सांगतात –
“शौर्य तलवारींत न्हय, पूण सत्यांत आसा. वायट कितलेंय आकर्शक आसलें तरी तें न्हयकारून सत्याचेर घट्ट उबे रावचें. तोच शौर्याचो खरो मार्ग.”
सेरेना विल्यम्स सारकी कश्ट आनी धैर्य दाखोवपी खेळगडी आसूं वा मेस्सी सारको सादेपण आनी प्रामाणीकपणाचें प्रतिक आसूं – खरेंच धाडस म्हणल्यार फट मार्ग सोडून सत्या वांगडा उबे रावप हें दोगूय आमकां शिकयतात.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
