भांगरभूंय | प्रतिनिधी
अंदूंचे रणजी क्रिकेट हंगामाचे पयलेच मॅचींत जैत जोडपाक येजमान गोंय पंगडाक चंदीगडा आड आयज निमाण्या दिसा 7 विकेटींची गरज आसा. पर्वरी क्रिकेट अकादमीचेर गोंयान पयल्या डावांत काडिल्ल्या 566 धांवड्यांचो फाटलाव करतना चंदीगडाचो पयलो डाव फक्त 137 धांवड्यांचेर सोंपलो.
अशे तरेन गोंयाक पयल्या डावांत 429 धांवड्यांची आघाडी मेळ्ळी. गोंयान ते उपरांत चंदीगडाक फॉलोऑन दिलें. चंदीगडान दुसऱ्या डावांत 3 विकेटी व्हगडावन 159 धांवड्यो केल्यात. चंदीगडा खातीर अर्जुन आझादान 109 बॉलांनी णव चवके आनी एका सक्याचे मजतीन नाबाद 76 धांवड्यो केल्यो.
डावान हार वांटावपाक चंदीगडाक अजून 270 धांवड्यांची गरज आसा.
ते पयलीं गोंयच्या 566 धांवड्यांचो फाटलाव करपी चंदीगडान काल 1 बाद 34 धांवड्यां वयल्यान मुखार खेळपाक सुरवात केली आनी ताचो डाव 137 धांवड्यांचेर सोंपलो. दर्शन मिशाळ आनी ललित यादव हांणी दरेकी 3 विकेटी घेतल्यो, जाल्यार अर्जुन तेंडुलकर, हेरंब परब आनी मोहित रेडकार हांणी एकेक विकेट मेळयली.
चंदीगडाची दुसऱ्या डावाची सुरवात लेगीत बाबत जाली. अर्जुन तेंडुलकरान पयल्या डावा प्रमाण दुसऱ्या डावांत लेगीत ओपनर शिवम भांब्रीक बाद केलो. दर्शनान मुखेली मनन व्होराची विकेट घेतली. अशे तरेन तांची स्थिती 2 बाद 13 अशी जाली. तचे उपरांत अर्जुन आझाद आनी भागमेंदर लाथेर हांणी तिसरे विकेटी खातीर 128 बॉलांनी 84 धांवड्यांची भागिदारी केली.
ही जोडी जमली अशें दिसता आसतना भागमेंदराक ललित यादवान स्वताचेच बॉलिंगेचेर कॅच बाद केलो. ते उपरांत अर्जुनान अंकित कौशिकाक वांगडा घेवन आक्रमक बॅटिंग केली. तांणी चवथे विकेटी खातीर अजून मेरेन 62 धांवड्यांची भागिदारी केल्या. गोंया वतीन अर्जुन तेंडुलकर, दर्शन मिशाळ आनी ललित यादव हांणी एकेक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
