भांगरभूंय | प्रतिनिधी
मडगांव : राय सरपंच जासिंटा डायस हांचे आड अविश्वास थाराव स आड पांच मतांनी संमत जालो.
राय पंचायतींतल्या सरपंच आनी उपसरपंचपदाचो संगीत खेळ सोंपना. ह्यान पयलीं उपसरपंचांचेर अविस्वास थाराव दाखल केले उपरांत सरपंच मारिओ डिसोझा हांणी अविश्वास थाराव दाखल जावचे पयलीं सरपंचपदाचो राजिनामो दिल्लो. सरपंचपदाचे जाल्ले वेंचणुकेंत झेविअर फर्नांडीस हांकां स आड पांच अशा मतांनी हारोवन जून 2025 वर्सा जासिंटा डायस हो सरपंच जाल्ल्यो. उपरांत रित्या आशिल्ल्या उपसरपंच पदावेली वेंचणूक 9 ऑक्टोबराक जाली आनी तेन्ना एकाच गटांतले गॉडफ्री सुझा आनी सिंथिया फर्नांडीस हीं एकामेका आड उबीं राविल्लीं. हे दोनूय पंच सत्ताधारी गटांतले आशिल्ले आनी आमदार आलेक्स रेजिनाल्ड हांचे समर्थक मानताले. मात, गॉडफ्री सुझा हांणी स आड पांच मतांनी सिंथिया फर्नांडीस हांकां हारोवन उपसरपंचपद मेळयलें.
उपरांत 10 ऑक्टोबराक विरोधी गटान स पंचांचे सयांनी सरपंच जासिंटा डायस हांचे आड अविश्वास ठराव दाखल केल्लो. ह्या वेळाच्यो पंचायत वेंचणुको जाल्ल्याक जासिंटा ह्यो चोवथ्यो सरपंच आसात. आंतानिओ झेविअर फर्नांडीस, मॅन्युएल रॉड्रिग्ज, पीटर क्वाद्रोस, गॉडफ्री ओसवाल्ड सुझा, मिंगुलिना डिसोझा, क्विनी डिकुन्हा इ डिकोस्टा ह्या स पंचांनी निवेदनाचेर सयो केल्ल्यो. सरपंच खंयच्याय निर्णयांत पंचांक विस्वासांत घेनात. तशेंच पंचांच्या कामांत कसलेच तरेचें सहकार्य करीनात, अश्या कारणा खाला बीडिओंकडेन अविश्वास थाराव दाखल केल्लो. ते प्रमाण गटविकास अधिकार्यांनी शुक्रारा अविश्वास थारावाचेर बसका घेतिल्ली. ताचेवेल्यानूय वाद जाल्लो. सरपंच जासिन्टा हांच्या गटांतल्या पंचांनी नोटीस स्विकारूंक नाशिल्ल्यान तांच्या घरा भायर नोटीस लायली. हाचे वेल्यान तांची सचिवांचेर मनमानी कारभाराचें आरोप केल्ले. शुक्रारा जाल्ले बसकेंत सरपंच जासिंटा डायस हांचे आड थाराव ६ आड पांच मतांनी संमत जाल्ल्यान तांकां सरपंच पदावेल्यान देवचें पडलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
