भांगरभूंय | प्रतिनिधी
मडगांव : राज्यांतल्या रस्त्याचें दुरुस्ती काम नोव्हेंबर निमाणे मेरेन पुराय जातलें. रस्तो खणपा खातीर जिल्लोधिकार्यांची परवानगी आसल्यारूय प्रधान मुखेल अभियंत्याची परवानगी गरजेची. निर्देश पाळूंक ना जाल्यार फौजदारी गुन्यांव नोंद करपाचे आदेश दिल्ल्याचे मंत्री दिगंबर कामत हांणी सांगलें.
मंत्री कामत हांणी दक्षीण गोंय जिल्लोधिकारी कार्यालयांत लोकां कडेन संवाद कार्यावळ आयोजीत केल्ली. उपरांत तांणी सांगलें, लोकांचीं कामां जावप गरजेचें. सेगीत पावटी मारच्यो पडच्यो न्हय, अश्यो सुचवण्यो अधिकार्यांक केल्यात. राज्यांतलीं रस्त्यांचीं कामां हातांत घेतल्यांत. चवथीच्या काळांत गरजेचे सुवातेर कामा रोखडींच हातांत घेतिल्लीं. आपणा कडेन जादवाची बडी ना. मंत्रिपदाचो ताबो घेतले उपरांत वास्को, दाबोळे, पर्वरे हांचे सयत हेर सुवातांचेर रस्त्यांची पळोवणी केल्या. अधिकार्यांक गरजेच्यो सुचवण्यो करीत रस्तो दुरुस्तीचीं कामां हातांत घेवपाक सांगलां. नोव्हेंबराचे निमाणे मेरेन राज्यांतलीं रस्त्यांचीं कामां पुराय जातलीं.
मंत्री कामत हांणी सांगलें, परवानगे बगर रस्त्यांचीं कामां केल्यार फौजदारी गुन्यांव नोंद करपाचे आदेश दिल्यात. रस्तो खोदकामा खातीर जिल्लोधिकार्यांची परवानगी आसली तरी प्रधान मुखेल अभियंत्यांची परवानगीय गरजेची. हो निर्देश पाळचो पडटलो. मडगांव कदंब बस स्टॅण्डाचे मुखार जीसुडाचे सुवातेर दुचाकी लायतात. ताचो कसलेच तरेचो महसूल येना. हाका लागून जीसुडाक पे पार्कींग विशीं निविदा जारी करपाक सांगलां. ५ नोव्हेंबर मेरेन निविदा काडटले अशें जीसुडा वतीन कळयलां.
‘म्हजें घर’ येवजण मडगांवां सुरू जावंक ना. दिवाळे उपरांत मुख्यमंत्री प्रमोद सावंत हांच्या वेळा प्रमाण कार्यावळीचें आयोजन करून हे येवजणेचें उक्तावण करतले. प्रधानमंत्री मोदी हांची पर्तगाळ मठांतल्या भेटी विशीं गरजेच्यो सुविधा बांदकाम खातें करतलें. पेड्डा मडगांवच्या फुलवाल्यांक कोणें काडपाचो यत्न केलो हें खबर ना. रस्त्या शेजरा बसप्यांक काडपाचें पालिके कडल्यान यत्न सुरू आसात. रस्त्यांचेर बसपाक दिल्यार लोकांक त्रास जातात. दामोदर देवळा कडेन बशिल्ल्यांक कोणूच काडचे नात. तशेंच पुलीस मुख्यालया मुखार ज्यो बायलो भाजी विकतात तांकांय नवी सुवात उपलब्ध जाय मेरेन काडचे न्हय म्हणून सांगलां. पोरण्या बस स्टॅण्डाचो आराखडो तयार करपाचें काम सुरू आसा. ते प्रमाण नियोजन करून उदरगत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
