भांगरभूंय | प्रतिनिधी
गोंयचे आदले मुख्यमंत्री रवी नायक हांच्या अचकीत मरणान गोंयच्या राजकारणांतलें एक पर्व सोंपलां. कुशळटायेन केल्लीं तांची पक्षांतरां, पक्षांतरां वयले न्यायालयाचे निवाडे, भौशीक बांदकाम मंत्री म्हणून तांणी फोंडें मतदारसंघाची केल्ली उदरगत, शिक्षणीक मळार केल्लो वावर यादींत उरतलो. मुख्यमंत्री, उपमुख्यमंत्री, मंत्री, आमदार, खासदार जाले तरी समेस्तांच्या खांदार हात घालून आपलेपण दाखोवप तांचें खाशेलपण, राजकारणी कसो आसचो ते सांगपी. भंडारी समाजाक एकठांय रावपाचो तांणी हालीं भौशीक कार्यावळींनी मारिल्लो उलो तांच्या मनांतली अस्वस्थताय परगटावपी.
कश्टांतल्यान वेवसाय करीत प्रतिश्ठा जोडपी, समाजाक वाट दाखोवपी रवीबाब आपल्याचेर जाल्ल्या आरोपां वेळार आरोप करतल्यांचेर चडाय करपी राजकारणी. दुस्माना कडेन इश्टागत दवरपी तांचें राजकारण अपेसा उपरांतय तांकां जैता मेरेन व्हरपी. आयज राजकारणांत येवपी तरणाट्यांनी तांच्या राजकारणांतल्यान खूब शिकपा सारकें आसा.
भाजपा सरकाराकच न्हय मुख्यमंत्री डाॅ. प्रमोद सावंत हांकां तेंको दिवन आपूण दुर्बळ समाजाच्या फाटल्यान रावपी हें रवीबाबान दाखोवन दिलें. तेंपा प्रमाणे कुरपणे घालत आपल्या पुतांक तळगाळांतल्यान राजकारणांत येवपाची वाट रवीबाबान दाखयल्या. आपलो राजकी उत्तराधिकारी म्हणून रितेशाक तांणी घडयला. 2022 चे विधानसभा वेंचणुकेंत रितेशान बापायच्या प्रचारकार्यांत वांटो घेतिल्लो. रवीबाबांचो राजकी उत्तराधिकारी म्हणून फोंडे मतदारसंघाचे पोटवेंचणुके खातीर एक युवा फुडारी रितेशाच्या रुपान भाजपांत आसा. रितेशाचें उंचेलें शिक्षण ताचो आनी भाजपाचोय प्लस पाॅयंट. भाजपाचें 2027 त 27 आमदारा मेरेन वचपाचें सपन पुराय करपाचें बळगें, घटाय फोंडें मतदारसंघाची पोटवेंचणूक आसतली. ती गवाय रवीबाबाच्या निमाण्या संस्कारा वेळार हाजीर रावन लोकांनी दिल्या.
धर्म, जाती भायर वचून राजकारण करपी रवीबाब एक बरे विरोधी पक्ष फुडारीय आशिल्ले. कूळ, मुंडकारां खातीर आवाज उठोवपी, तांकां बरे दीस येवचे म्हणून वावुरपी, न्यायालयांत वचपी रवीबाबा विशीं तांचे इश्ट सांगतलेच. बायलां आनी भुरगीं उदरगत खात्याचे मंत्री म्हणूनय तांणी बेस बरो वावर केला. सभेक गर्दी कशी जमोवप, गरिबां मेरेन सरकारी येवजण्यो कश्यो पावोवप तें भाजपाकय तांणी शिकयलें. गोडेंमूत, काळजाचें दुयेंस तांकां आशिल्लेंच ताचे परस व्हडलो दुस्मान तांची वाडिल्ली पिराय.
इंग्लेज नाका कोंकणी उलय, प्रस्न विचार, ती आमची राजभास. हीं उतरां राष्ट्रीय दिसाळ्याच्या पत्रकाराक विरोधी पक्ष फुडारी म्हणून सांगपी रवीबाब आयजय म्हज्या यादींत आसात.
2022 चे विधानसभा वेंचणुकेंत समोसा खाओ, चाय पिओ हीं तांचीं उतरां कॅमेराचें भिरें चुकोवपा पासत आसुये. नाजाल्यार प्रस्थापीत आसूनय ते कशे जिखपाचे? 2022 चो प्रस्थापिता विरुद्धचो (अॅण्टी इनकम्बन्सी) फॅक्टर 2026 चे विधानसभेचे पोटवेंचणुकेंत भाजपाचें बळगें थारतलो. फाटल्या तीन वर्सांनी रवीबाबान आपल्या मतदारसंघांत केल्ल्या वावराची पावती विधानसभा पोटवेंचणुकेंत भाजपाक मेळटली.
पूत राॅय हांचेर जाल्ल्या आरोपां वेळार एक बापूय, एक गृह मंत्री रवीबाबाच्या रुपान विधानसभेन पळयला. पिरायेन ल्हानाकय आपले गुरू मानपी रवीबाबान आपल्या पुतांक वेवसायाची वाट दाखयली. फोंडें मतदारसंघांत एका परस एक फुडारी भाजपा कडेन आसतले पूण जिखपाची तांक म्हत्वाची. ती भाजपान केन्नाच जोखल्या.
आदले उपमुख्यमंत्री फ्रान्सीस डिसोझा हांच्या मरणा उपरांत तांचे पूत उपसभापती ज्योशुआ डिसोझा हांकां भाजपान राजकारणांत हाडले. पोटवेंचणुके उपरांत 2022 ची वेंचणूक ज्योशुआ म्हापशें मतदारसंघांतल्यान जिखून आयले. तीच नीती फोंडे मतदारसंघा पासत पोटवेंचणुकेंत भाजपान आपणायल्यार 2027चे विधानसभा वेंचणुकेचें तें बळगें थारतलें.
बंद केल्ल्यो खणी बेगीन सुरू करात, तरणाट्यांक माश्काॅतां विकचीं पडल्यांत ह्या उतरां वांगडा रवीबाबाची विधानसभेंतली अॅक्शन मुख्यमंत्र्यांकय हांसोवपी.
प्रदेश काँग्रेस अध्यक्ष म्हणून काँग्रेसीक जैता कडेन व्हरपी, फक्त 217 मतांनी उत्तर गोंय (पणजी) मतदारसंघातल्यान लोकसभा वेंचणूक जिखपी रवीबाब एक इतिहासच. वीज मंत्री सुदिनबाब ढवळीकार बरे येरादारी मंत्री अशी तोखणाय करतना थोमणो मारपी रवीबाब मडकयच्यान फोंड्यां पावले. सुदिनबाबय पात्रांवच, एका वेगळ्या राजकी मोडणार आसात. व्हड राजकी खेळी फुडारांत खेळपी आमदार गोविंद गावडे हांकां वेंचून हाडपाक रवीबाब हांचो वांटो आसा.
2022चे विधानसभा वेंचणुकेंतलें राजकारण आयज ना. फोंडेंचे सगले मतदारसंघ सत्ताधारी भाजपा वटेन आसात. 2027 गोंय विधानसभा वेंचणूक लागीं पाविल्ली आसतना भाजपाचें बळगें देशांत वाडल्यार अजाप दिसचें न्हय.
गोंयांत जिल्हो पंचायत वेंचणुकेची तारीख मतदारांक कळटा आसतनाच रवीबाबांच्या दुखेस्त मरणाची खबरय पावली. पंचायत, जिल्हो पंचायत, नगरपालिका, विधानसभा, लोकसभा वेंचणुकेंत रवीबाब सदांच वावुरपी, बसून रावपी न्हय. खंयच्या कोनशाक कितें शिजता तें सांगपी कार्यकर्ते तेच भाजपाचो व्हड आदार.
शिकात, शिकयात आनी चार पयशे जोडात ही रवीबाब मंत्री आसतना बायलां आनी भुरगीं उदरगत खात्यान केल्ली येवजण आयजय उपेगी. हे येवजणेंतल्यान गोंयच्या अस्तुरी सक्षमीकरणाक, स्वयंपूर्णांक बळ मेळ्ळां. गोंयच्यो अस्तुरी लखपती, करोडपती जाल्यो, अांगणवाडींत बदलांचे वारें आयलें तातूंतय रवीबाब वांटेकार आसात. तांच्या फकांडां करपाच्या सभावान तिडक येताली पूण फकांडांतल्यान तिडकीचें ल्हार पेटोवपाची, पालोवपाची कला रवीबाबां कडेन आशिल्ली हें आयज तांच्या सांगांत्यांक
होलमतलें.
आपल्या नांवाचो अर्थ सांगतना रवी म्हणल्यार सूर्य. सांजवेळा अस्तमेक गेलो तरी तो सकाळीं परतून उदेंतलो, उजवाड दाखयतलो अशें सांगपी रवीबाब भाजपाचें व्हड बळगें, 2027 च्या 27 चें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
