भांगरभूंय | प्रतिनिधी
सुड घे ताचो लंकापती….. इतल्या उतरांनी तापयिल्ल्या दशानन रावणान, रामा कांगडा युद्ध करप आणि सीतेक उबारप अशें थारायलें. ताणें ते खातीर मारिच्याची मदत मागली. श्रीरामांचो पराक्रम मारीचाक खबर आशिल्ल्यान ताणें रावणाक समजावपाचो कितलोसोच यत्न केलो… शेवटाक कपट करचें अशें थारावन एक कल्पना येवजिली. रावणान मारिच्याक हरणाचे रुप घेवपाक सांगलें आनी आपूण संन्याश्याच्या रूपान मरिच्या फाटोफाट पंचवटीन गेलो. मारिच्यान घेतिल्लें त्या सुवर्णमृगाचे रूप पळोवन सीतेक रावू नजो जालें. तिका तो हरण खुब आवडलो. ती पर्णशाळेंत आयली आनी श्रीरामाक म्हणापाक लागली.
तें हरण अयोध्यानाथा
तीं फुलां, तोडटना सहज पळयलो आत्तां।
दियात म्हाकां हाडून तें हरण अयोध्यानाथा ।।धृ।।
शिंगांचेर रत्नां चमचम करपी दिसतात तीं।
नव्या फुलां भशेन भुलोवप सुवर्ण कांती।
भुलली हांव पळोवन सुवर्ण रंगाक त्या ती।
तें इंद्रधुनुशें पुच्छ दिसलें ते उडटा ।। 1।।
तो गेलो येवन दिसता कितल्या फावटी।
दिसतात तीं खुरांचीं चिन्हां फुडें फाटीं।
सगळ्याच खुट्यांक घासल्यांत ताणें शिंगा ती।
तो दिसता सुवर्णी पळय लक्ष्मणा, नाथा ।। 2।।
वेगीं वेगीं चलतना तो हरण हालयता मान।
एक वेगळोसो भाव दिसता ताच्या दोळ्यांन।
प्रेमा उमाळो आयलो म्हाका पळोवन तो हरण।
घडये पिशींच जालीं तांकां चरतना पळयता ।। 3।।
कितें कितें म्हूण कौतुक हांवें सांगचें।
हरणांक घरप शक्य ना कशें तुमी म्हणचें।
म्हजे खातीरूच म्होडिल्लें तुमी धनु शिवाचें।
करा घाई तुमी फाटीक भातो हांव बांदतां ।। 4।।
कोठयांनी भरिल्लें अयोध्येन जे धन।
तें सोदता आसतले ‘चरणा’ खातीर हें वन।
आर्य, चला, आनी येयात ताका तुमीं घेवन।
तो मेरेन राखतलो हें कुटीर आमचो भ्राता ।। 5।।
जर मेळ्ळो तो सजीव आमच्या हाती।
ताच्या आंगांची रत्ना जातल्यो ज्योती।
दितलीं आमकां ती उजवाड रानान ह्या राती।
व्हरचो वांगडा पुरीक परत आमी वेतां ।। 6।।
मागीर पळयतल्यो तीं हरणां मायो जावो।
करतले कैकयी आनी भरत आमचो हेवो।
जपतलीं तो मेरेने हांव म्हज्यो हो ठेवो।
आजून रावल्या कित्याक धनु धरा तुमी आता ।।7।।
जर मारलो बाण सारकोच तुमी ताचेर।
ताचें चामडे काडून हाडटल्लो म्हजो देर?
त्या इंद्रा भशेन तुमी सोबतले बसल्यार वयर।
पळयात तांकां तो दोंगर चडटा सो दिसता ।।8।।
– उदयबुवा फडके (राष्ट्रीय कीर्तनकार)
97642 43377
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
