भांगरभूंय | प्रतिनिधी
पणजी : राज्यांत रस्ते अपघातांत मरण येवपी दुचाकी चालकांचो आंकडो फाटल्या कांय वर्सां सावन वाडतूच आसा. 2021 चे तुळेंत 2023 वर्सा रस्तो अपघातांतल्या दुचाकी चालकांच्या मरणाचो आंकडो 4 टक्क्यांनी वाडला. चारचाकी चालकांच्या मरणाचो आंकडो 9 टक्क्यांनी, जाल्यार चलत वचप्यांचो मरणाचो आंकडो 7 टक्क्यांनी उणो जाला. राष्ट्रीय गुन्यांव नोंदणी विभागाच्या (एनसीआरबी) ’भारतांतलीं अपघातांत मरणां आनी आत्महत्या’ ह्या अहवालांतल्यान ही म्हायती मेळ्ळ्या.
अहवाला प्रमाण, राज्यांत 2021 वर्सा वट्ट 2850 रस्तो अपघातांची नोंद जाल्ली. हातूंत 856 जखमी जाल्ले. जाल्यार 226 जाणांक मरण आयिल्लें. हातूंत 151 दुचाकी चालक (66.81 टक्के) आशिल्ले. जाल्यार 29 चारचाकी चालकांक ( 19.20 टक्के) आनी 34 चलत वतल्यांक (22.51 टक्के) मरण आयिल्लें. 2023 वर्सा वट्ट 2848 रस्ते अपघातांची नोंद जाली.
हातूंत 1180 जखमी जाले, जाल्यार 292 जाणांक मरण आयिल्लें. हातूंत 207 दुचाकी चालक (70.80 टक्के) आशिल्ले. जाल्यार 29 चारचाकी चालकांक ( 9.93 टक्के) आनी 44 चलत वतल्यांक (15.05 टक्के) मरण आयिल्लें.
राज्यांत 2022 वर्सा वट्ट 3012 रस्ते अपघातांची नोंद जाल्ली. हातूंत 1071 जखमी जाले, जाल्यार 274 जाणांक मरण आयिल्लें. हातूंत 180 दुचाकी चालक (65.69 टक्के) आशिल्ले. जाल्यार 26 चारचाकी चालकांचो (9.48 टक्के) आनी 54 चलत वतल्यांक (19.70 टक्के) मरण आयिल्लें. तिनूय वर्सांनी राज्यांतल्या रस्ते अपघातांत सायकलस्वार तशेंच ट्रक चालकांच्या मरणाचें प्रमाण तुळेंत उणें आशिल्लें वयल्या काळांत राज्यांत 15 सायकल चालक आनी 13 ट्रक वा टेम्पो चालकांक मरण आयिल्ल्याचें अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
