भांगरभूंय | प्रतिनिधी
सतत समाजा खातीर निरपेक्ष मनान काम करीत रावपाची इत्साशक्त आसली, काय तिका पिरायेची आडखळ येना. शेतकी मंत्री रवी नायक जीणभर कार्यरत रावले. मेळ्ळां त्या- त्या खात्याचें काम तांणी नेटान केलें, हेंच जाय तेंच जाय केलें ना. भोवजनांचे ते खऱ्या अर्थान फुडारी, गुंडांचें कर्दनकाळ आशिल्ले. मुख्यमंत्री, गृह मंत्री म्हूण तांची कारकीर्द गाजली. हाचे मुखार घडये कोणाक धाडस जावचें ना, असले निर्णय तांणी सहज घेतले. ते चालीक लायले. मंत्रीपदाचो अहंगंड केन्ना बाळगलो ना. जायत्या जाणांनी टिका केली, फकांडां केलीं, पूण तांणी केन्ना कोणाचेर राग धरिल्ल्याचें याद ना. गरिबां विशीं तळमळ आशिल्लो, सभावांत नमळाय आशिल्लो, भायर एक आनी भितर एक नाशिल्लो राजकी फुडारी सांपडप कठीण, मात रवीबाब ताका आडवाद. सत्तेचे तेंगशेर आसतनाय ते कोणाच्या खांद्यार हात घालून उलयताले. तांच्या मिश्कील सभावाचें दर्शन सोशल मिडियाक लागून आयज सगल्याक जाता, पूण ते सुरवेक सावन विनोदी, हलकें फुलकें उलोवपी, मुखार बशिल्ल्याची फिरकी घेवपी. तांच्या ह्या सभावाक लागून विधानसभेंतलो ताण, तणाव खिणा भितर विरघळून वतालो.
25 जानेवारी 1991 ते 18 मे 1993 मेरेन रवीबाब काँग्रेसीचे मुख्यमंत्री आशिल्ले. मगो पक्षांतल्यान ते आयिल्ले. उपरांत 2 एप्रील ते 8 एप्रील 1994 मेरेन स दीस मुख्यमंत्री. 2000 ते 2002 मेरेन ते भाजपा सरकारांत उपमुख्यमंत्री आशिल्ले. ‘हांव 1967 सावन राजकारणांत आसां. गोंय विलिनीकरणा आड हांवें खूब काम केलां,’ अशें तांणी एके मुलाखतींत सांगिल्लें.1998 त ते खासदार म्हणूनय वेंचून आयिल्ले. 1990 च्या दसकांत गोंयांत कांय गुंडांचो शेक चलतालो. कांय गांव गुंडगिरी खातीर बदनाम जाल्ले. रवीबाबान तांकां कायद्याच्या चपक्यांत धरले. थोड्यांक राष्ट्रीय सुरक्षा कायद्या खाला भितरूय उडयले. स्मगलिंगा आड खर मोहीम चलयली. गुन्यांवकारी मानसीकतायेचे कितलेशेच तरणाटे भिवपाची गरज आसा, म्हणीत त्या काळार लिपून बशिल्ले. एका पत्रकाराचेरूय हल्लो जाल्लो. साश्टींतले दोन आमदार स्मगलींग एजंट आसात, अशें कस्टम कलेक्टरान जाहीर केल्लें. रवीबाबान त्या वेळार खास पुलीस पंगड स्थापन करून बेकायदेशीर कारवायांक आळाबंद हाडलो. 21 सप्टेंबर 1991 दिसा तांणी एका आदल्या मुख्यमंत्र्याक अटक केल्ली. हें प्रकरण तेन्ना राष्ट्रीय पांवड्याचेर खूब गाजिल्लें. आयज ते आदले गुन्यांवकार वेगळ्या वेगळ्या मळांचेर फाफसल्यात, वाल्याचे वाल्मिकी जाल्यात. राजकारणांतूय पावल्यात. मात तांचो जागो आयज नव्या तरणाट्यांनी घेतला. फाटीं रामा काणकोणकार प्रकरण जालें, तेन्ना गोंयकारांक गृह मंत्री रवी नायक हांची याद जाली. हाचे वयल्यान तांचो भंय कितलो आशिल्लो, ताची फक्त कल्पना करची. राजकी मळा वयले ते खऱ्या अर्थान पात्रांव
(धनी) आशिल्ले.
दिगंबर कामत मुख्यमंत्री जावचे पयलीं रवी नायक हांचें नांव त्या पदा खातीर थारिल्लें. तांणी सगली तयारीय केल्ली. उपरांत गृह मंत्री पद घेवचें पडलें. पूण तांणी खिलाडूवृत्तीन तें स्विकारलें. आदळआपट केली ना, तांचो घुस्मटमारूय जालो ना. मोटारसायकल पायलट, राष्ट्रीय पांवड्या वयलो व्हाॅलिबाॅल खेळगडो, बार अॅण्ड रेस्टाॅरंण्टाचो धनी ते मुख्यमंत्री पदा मेरेनची तांची वाटचाल अजाप करी सारकी आसली. तांच्या हालींचे कारकिर्दींत गोंयचें शेतकी मळ 50 टक्के स्वयंपूर्ण जालां, अशें म्हणटात ते फट न्हय.
मरण एक जिवीत सोंपयता, नातें न्हय. रवी नायक आमचे मदल्यान देहरुपान गेल्यात. मात तांची प्रशासना वयली पकड, सतत काम करीत रावप, गरिबां विशीं तांकां आशिल्ली तळमळ, मिस्कील सभाव…. सदांच याद उरतलो. ते गेले, तरी भौसाचें तांचे कडेन आशिल्लें नातें कायम उरतलें. रवीबाबाक आर्गां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
