भांगरभूंय | प्रतिनिधी
न्यायालय : रातचीं 8 ते सकाळचीं 8 वरां मेरेन पुलीस गस्त घालात
भांगरभूंय । प्रतिनिधी
पणजी : गोंयांत काडपी बेकायदो रेंव प्रकरणा संबंदांत गोंयांतल्या मुंबय उच्च न्यायालयान म्हत्वाचें निर्देश दितना म्हणलां, रातचीं 8 ते सकाळचीं 8 वरां मेरेन पुलीस गस्त घालची, नोंदणी करूंक नाशिल्ल्यो व्हडीं दिसल्यार जप्त करच्यो तशेंच बेकायदो रेंव काडपाचें आडावपा खातीर सगले गरजेचे उपाय करात. अशे निर्देश दिवन अवमान याचिका निकालात काडली. हे विशींचो निकाल न्या. भारती डांगरे आनी न्या. आशिष चव्हाण हांच्या दोन वांदड्यांच्या न्यायपिठान दिला.
ह्या प्रकरणांत ‘रेन्बो वॉरियर्स’ हे संघटणेन मे 2018 त उच्च न्यायालयांत बेकायदो रेंव काडपा संबंदांत मूळ जनहीत याचिका दाखल केल्ली. खंडपिठान ती 18 डिसेंबर 2019 ह्या दिसा निकालांत काडिल्ली. त्या वेळार राज्य सरकार, खण, येरादारी, पुलीस, कॅप्टन ऑफ पोर्ट कप्तान, तशेंच संबंदीत खात्यांक बेकायदो रेंव वेवसाय करप्यांचेर कारवाये विशीं खंडपिठान विवीध निर्देश जारी केल्ले.
निर्देश जारी करून लेगीत बेकायदो रेंव वेवसायाचेर कसलोच परिणाम जायना तें दिसले उपरांत गोवा रिव्हर सॅण्ड प्रोटेक्टर्स नॅटवर्क हांणी 2021 त अवमान याचिका दाखल करून बेकायदो रेंव वेवसायाचो मुद्दा परतून एकदां साणीर हाडिल्लो. एप्रील 2024 त ही याचिका निकालात काडली. त्या वेळार पुलीस खात्याक न्यायालयान खूब आदेश दिले. हे मजगतीं परतून कांयच जायनाशिल्ल्यान याचिकादारांनी 2025 त परतून अवमान याचिका दाखल केली.
हे याचिकेचे सुनावणे मजगतीं रातच्या वेळार खूबश्या वाठारांनी अजून रेंव काडटात असो दावो याचिकादारांनी केलो. हाची दखल घेवन सरकार तशेंच याचिकादारांनी रेंव काडपाचें आडावचे खातीर उपाय येवजण सुचयली. तशेंच सरकारान घेतिल्ल्या निर्णयांची म्हायती न्यायलयांत सादर केली. हाची दखल घेवन न्यायालयान सगले गरजेचे उपाय करपाचे निर्देश दिवन अवमान याचिका निकालात काडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
