भांगरभूंय | प्रतिनिधी
राज्यांतल्या 186 पंचायतीं खातीर फाल्यां, म्हणल्यार बुधवार 10 आॅगस्टाक मतदान जाता. सध्या 64 उमेदवार विरोधा विणें वेंचून आयल्यात. तर 5038 रिंगणांत आसात. वेंचणुकां खातीर गोंय सज्ज आसा. तशें पळोवंक गेल्यार राज्यांतली ही सगल्यांत व्हडली वेंचणूक, मात हे खेपे उमेदवारां मदीं मात्तूय उमेद दिसली ना. आतां मतदार कितले जागृत आसात, ते 12 आॅगस्टाक कळटलें. ते दीस पयले मुख्यमंत्री भाऊसायब बांदोडकार हांची पुण्यतीथ. गोंयचे उदरगतीची म्हूर्तमेढ रोंवपी भाऊ. ते दीस गोंयचो फुडार थारावपी पंच वेंचून येतले आनी ते गांवांचे उदरगती खातीर निसुवार्थीपणान वावुरतले, अशी आस्त बाळगुया.
वेंचणुकेंत घराणेशाय आसताच. घराणेशाय म्हणजे घराणेशाय. तांची आनी आमची, अशी ती वेगळी नासता. ह्या पंचायत वेंचणुकांनीय ती आसा. तिसवाडी म्हालांत कांय कडेन घरचे, लागींचे सोयरे वेगवेगळ्या प्रभागांनी उबे रावल्यात. आरजीचे आमदार बोरकार आनी काँग्रेसीचे आमदार फळदेसाय हांणी ती आपणाक पसंत ना, अशी प्रतिक्रिया दिल्या. मात उलोवपा बदला ते आनीक कांय करपाक शकनात. सगल्या उमेदवारांची शेंडी आसा, ती मतदारांच्या हातांत. घराणेशाय कायद्यान बंद केले बगर एकाच घरांतले उमेदवार उबे रावतलेच…. आनी सध्या तरी हे गजालीचेर बंदी येवपाची शक्यताय ना. ते बाबतींत सगले पक्ष एकजूट आसात! विधानसभा वेंचणुके वेळार 3- 4 जोडपीं उबीं राविल्लीं. आलेमांव फामिली वेळार बोवाळ जाल्लो, तसो हे खेपे जालो ना. भोवतेक सगलीं जोडपीं वेंचून आयलीं. ताचे पयलीं कळंगुटच्या उमेदवारान एक प्रतिक्रिया दिल्ली. आमकां जैतिवंत करप वा हारोवप हें मतदारांच्या हातांत आसा. तुमी घराणेशाय म्हूण कित्याक टिका करतात. खरें तांचें. फाल्यां चार भाव आनी तांच्यो बायलो मेळून एकाच घरांतले आठ जाण उबे रावले आनी मतदारांनी तांकां सगल्यांक जिखून दिले जाल्यार दोश त्या उमेदवारांक, पक्षाक दिवपाक मेळचो ना. कायदो, नैतिकताय हे बाबतींत कितें चुकलां आसत, पूण ते कायदेशीर मार्गान वेंचून आयले. मागीर दोश मतदारांक दिवचो पडलो ना? आमी मतदारूच कितें तरी विशिश्ट हेतू, सुवार्थ मनांत दवरून घराणेशाय मानून घेतात. तेन्ना हाचे मुखार खंयचीय वेंचणूक जावं, घराणेशाय ही दिसतलीच. भ्रश्टाचार हें राजकारणाचें म्हत्वाचें आंग जालां, तो दर्जो घराणेशायेकूय मेळटलो.
प्रत्येक मतदारान गांवां खातीर वावुरपी, प्रामाणीक उमेदवाराक वेंचून दिवचो, असो उलो कांय पक्षांनी मारला. तो लाचार नासचो. सरकार पक्षा वटेनचो उमेदवार वेंचून येना जाल्यार विकासकामां जावची नात, असो एक विचार राजकी मळाचेर रुजला. तो कितलो मेरेन खरो, हें जाचें ताणें थारावचें. विरोधी उमेदवारांच्या मतदारसंघांक, प्रभागांक कायद्यान दुय्यम वागणूक दिवपाक मेळना. मंत्री हो राज्याचो, सरपंच हो पुराय गांवचो, ही भावना मतींत दवरून तांणी काम करपाक जाय. पूण तें जायना, अशें मतदारूच उलयतात. पंच काम करीना जाल्यार ताका जाब विचारात, असो उलो मारपी धर्मगुरूचो व्हिडियो सध्या व्हायरल जाला. मात, ग्रामसभा आनी कट्टर विरोधक सोडल्यार हेर कोण पांच वर्सां पंचांचे वाटेक वचनात, ही वस्तुस्थिती.
व्हडल्या राज्यांनी वीज, उदक, शिक्षण, भलायकी मळाचेर पंचायती काम करतात. गोंयांत हीं कामां सरकार पळयता. वास्तविक पंचायत, पालिकांक चडांत चड कामां दिवपाक जाय. फक्त गटारां बांदप हें पंचायतींचें काम न्हय. सगल्यो सरकारी येवजण्यो गांवांतल्या लायक मनशांक मेळटल्यो, हें पंचांनी पळोवंक जाय. कोयराची, रस्ताद गोरवां, सुण्यांची समस्या सोडोवंक जाय. लायट, उदक, येरादारीचेर लक्ष दवरुंक जाय. फक्त राज्य पांवड्या वयल्या फुडाऱ्यां फाटल्यान भोवप इतलेंच पंचांचें काम न्हय. राज्य, देश स्वतंत्र जावन कितलींशींच वर्सां जालीं, तरीय अजून तींच- तींच उदरगतीचीं कामां करचीं पडटात. म्हणजे खंय तरी कितें तरी चुकता. प्रत्येक गजाली खातीर आमदार, मंत्र्याचेर अवलंबून रावप योग्य न्हय. बायल सरपंचांनीय स्वताच्या मनान निर्णय घेवपाक जाय. पुजे वेळार घोवाच्या हाताक हात लायतात, तशें कोणें वागचें न्हय. पंचायतीच्या कामांनी घोव, आमदारांचो हात लुडबूड करपाक लागलो जाल्यार तो कुशीक सारपाचें धाडस पंच बायलांक जावचें. हे वेंचणुकेंत उक्तेपणी पक्ष नात, मात भितरल्यान तांचीं पॅनलां आसतलींच. तें कितेंय जालें तरी स्वराज्य संस्थांचेर वेंचून येवपी सगल्यांनी गांवाक कितें बरें, ताचो पयलो विचार करचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
