भांगरभूंय | प्रतिनिधी
चिंतन – 60
तुकाराम महाराज म्हणटात –
जेणें वाढे अपकीर्ती।
सर्वार्थी तें वर्जावें॥
म्हणल्यार आमच्या वागणुकेक लागून, उलोवपाक लागून वा कर्तुबांक लागून अपकीर्त वाडटा तें आमी सोडून दिवचें. दिसपाक हो एक सादो नेम दिसता, पूण आमचें जिवीत जगतना हो नेम कायम याद दवरपाक जाय.
आमी सगळे समाजांत रावतात. लोक आमची दरेक कृती पळयतात. आमी चूक केल्यार बदनामी जावपाक चड वेळ लागना. कांय वर्सां आदीं एका सरकारी अधिकाऱ्याचो व्हिडियो सोशल मिडियाचेर व्हायरल जाल्लो. तो आपल्या कामा खातीर लोकां कडल्यान लांच घेतालो. तो व्हिडियो कांय खिणां खातीर चल्लो, पूण ताणें त्या अधिकाऱ्याची कितल्याशाच वर्सांची प्रतिमा एका खिणाक इबाडली. नोकरी गेली, मान गेलो आनी ताची सावळी ताच्या कुटुंबाचेरूय पडली. हेंच तुकोबाचें सांगणें – जें अपकिर्तीक कारण जाता तें टाळपाक जाय.
आयच्या काळांत अपकीर्त टाळपाक जाय जाल्यार दोन गजाली म्हत्वाच्यो – पारदर्शकताय आनी संयम. देखीक, एका तरणाट्या उद्देजकान आपले कंपनीचें उत्पादन जायरातींत खूब बरे तरेन दाखयलें, पूण प्रत्यक्षांत तें बऱ्या दर्जाचें नाशिल्लें. पयल्या थोड्या गिरायकांनी कागाळ केली तेन्ना ताणें तांकां गंभीरतायेन घेवंक ना. कांय दिसां भितर सोशल मिडियाचेर नकारात्मक प्रतिक्रिया पातळ्ळ्यो आनी कंपनीचें नांव घाण जालें. कांय म्हयन्यां भितर हो वेवसाय बंद जालो. ताचे कडेन प्रतिभा आशिल्ली, कश्ट आशिल्ले, पूण अपकिर्तीन, बदनामीन सगळें गिळ्ळें.
खेळां मळारय अपकीर्त आनी कीर्त ह्या दोनूय गजालींचीं उदाहरणां मेळटात. कांय वर्सां आदीं एक नामनेचो क्रिकेट खेळगडो मॅच फिक्सिंगांत वांटो घेतालो. तो खेळगडो एका काळार लाखांनी फॅन्सांचो हिरो आशिल्लो, पूण मॅच फिक्सिंगाचे चुकीक लागून ताचेर जीणभर बंदी आयली. ताचें नांव सदां खातीर बदनामींत आडकून उरलें.
सोशल मिडियाचेरूय हें लागू जाता. जेन्ना लोकांक इश्टाचो वा समाजीक संस्थेचो राग येता तेन्ना ते रोखडेंच कितें तरी बरयतात. उतरांचो गैरसमज जाता आनी मागीर तांकां माफी मागची पडटा. मात्सो चड धीर धरलो जाल्यार, दोन फावटीं विचार केल्लो जाल्यार बदनामी टाळूंक मेळटाली. आयच्या काळांत हो नेम खासा म्हत्वाचो आसा.
तुकाराम महाराजाचो हो नेम म्हणल्यार फकत भंयान जगप न्हय. पूण सदांच स्वताक योग्य मार्गाचेर दवरप. अपकीर्त टाळप म्हणल्यार दुसऱ्याचो विस्वास जपप. कारण एकदां विस्वास ना जालो म्हणटकच कितलोय यत्न केलो तरी तो सहज परत मेळना.
आयच्या तरणाट्यांनी हो नेम खरपणान याद दवरचो – “जिणेंत येस मेळोवप व्हडलें न्हय, तें मेळयतना आपली प्रतिश्ठा, कीर्त जपप म्हत्वाचें.” कारण अपकिर्तीक लागून तुमकां सगळेंच एका खिणाक वगडावचें पडटा.
– ह भ प देवदत्त दिगंबर परुळेकर
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
