भांगरभूंय | प्रतिनिधी
नागरी पुरवण, हस्तकला खात्यांतय केलो मोलाचो वावर
पणजीः गोंयचें शेतकी मळ स्वयंपुर्णताये कडेन व्हरपा खातीर शेतकी मंत्री रवी नायक हांचो मोलाचो वाटो आसा. नायक हांचे कारकिर्दींत शेतकी खात्यान बरेच फावटी खूब बरी कामगिरी केल्या. आतां मेरेनच्या शेतकी मंत्र्यांचे कारकिर्देचे तुळेंत रवी नायक हांची कारकिर्द तोखणाय करपा सारकी. ते भायर नागरी पुरवण आनी हस्तकला खात्यानय तांच्या फुडारपणा खाला बरी कामगिरी केल्या.
गोंय शेतकी मळार 50 टक्के स्वयंपूर्ण जालां अशी घोशणा मुख्यमंत्री डॉ. प्रमोद सावंत हांणी हालींच केल्ली. हो 50 टक्के पांवडो हुपपाचें स्रय शेतकी मंत्री रवी नायक हांकां वता. तांच्या काळांत पडींग जमीन लागवडी सकयल येवन नवे शेतकार तयार जाले. लागवडीचें क्षेत्र वाडलें, शेतांचें लुकसाण जाल्यार लेगीत शेतकारांक वेळा भितर लुकसाण भरपाय दिली. नायक हांचे कारकिर्दींत भाजी पयलेचे खेपे भायल्या राज्यांत निर्गत जावपाक लागली आनी पयले खेप मानकुराद आंबो लंडनाक पावलो.
रवी नायक हांणी एक खेपेचे सहाय्य (वन टायम एसीटन्स) ही येवजण चालीक लायली. राज्यांतल्या 97 शेतकारांनी शेतांनी परत देवन पडींग जमीन लागवडी खाला हाडली आनी हे खातीर तांकां 20 लाख इतलें अनुदान दिलें. नायक हांच्या ह्या यत्नांक लागून राज्यांतल्या सुमार 130 हॅक्टर पडींग सुवातांचेर पिकावळ फुल्ली. ते भायर शेतकी मळार तंत्रागिन्यानाची जोड दिवपा खातीर 12 हजार शेतकारांक माक्ना घेवपाक 18 कोटी मेरेनचें अनुदान दिलें.
ते भायर गोंय फलोत्पादन महामंडळान खात्रीशीर बाजार येवजण चालीक लावन राज्यांत जावपी तवशीं, भेंडे, चिटकी, कोंकण दुदी, वायंगीं, पांचवी मिरसांग आनी कोबी ही भाजयेची पिकावळ काडपाक गोंय स्वयंपूर्ण जालां. गोंयच्या 1187 शेतकारांनी 3 लाख किलां परस चड भाजी कर्नाटकांत निर्गत केल्या.
नायक हांच्या फुडारपणा खाला मानकुराद पयलेच खेपे लंडन शारांत पावलो. शेतकी खात्यान आंबे निर्गत करपा खातीर ट्रायल सुरू करुन 300 किल मानकुराद आंबे युकेंत धाडले. गोंयच्या मानकुरादांक लंडन शारांत बरीच मागणी वाडली.
नागरी पुरवण आनी गिरायक वेव्हार खातें
नागरी पुरवण खात्यान पयलेच खेपे फोर्टीफायड तांदूळ पुरवण करपाक सुरवात केली तेन्ना ह्या तांदळा विशीं खुब जाणां मदीं संभ्रम तयार जालो आनी विरोधकांनी विरोध लेगीत केल्लो. आमी गरीबांक तांदळांत विटामीन मिक्स करून दिता अशें विनोदी वक्तव्य करीत नायक हांणी हो संभ्रम पयस केलो आनी आतां फोर्टीफायड तांदळाची नेमान पुरवण जाता.
हस्तकला खातें
हस्तकला मंत्री ह्या नात्यान नायक हांणी गोंयच्या कुणबी कापडाचें रुपांतर फॅशन स्टेटमेंटांत केलें. फक्त कुणबी शॉल मेरेन हस्तकला खातें मर्यादीत रावनासतना कुणबी साडी, कुणबी जॅकेट, कुणबी टॉपी मेरेन उत्पदनां तयार करून कुणबी हातमाग हो संवसार पांवड्यार व्हेलो. ते भायर हस्तकला खात्या वरवीं पीएम विश्वकर्मा येवजण बरे भशेन चालिक लावन परंपरीक वेवसायीकांक उर्बा दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
