भांगरभूंय | प्रतिनिधी
पणजी : कुळ आनी मुंडकारांक न्याय दिवपी गोंयचे आदले मुख्यमंत्री रवी नायक अंतरले. राजकी अस्थिरताय आनी वाडपी गुन्यांवांच्या आव्हानात्मक काळांत तांणी घेतिल्ले खर भुमिकेक लागून तांचीं कारकीर्द सदांच उगडासांत उरतली.
राजकी घडामोडी आनी स्थित्यंतरां
रवी नायक हांणी 25 जानेवारी 1991 ते 18 मे 1993 ह्या काळांत मुख्यमंत्रीपद सांबाळ्ळें. तांची कारकीर्द खुबश्या म्हत्वाच्या राजकी घडामोडींची साक्षीदार थारली. 12 एप्रिल 1991 दिसा म. गो. पक्षाच्या गटाचे कॉंग्रेसींत विलीनीकरण जालें. उपरांत 14 जुनाक लोकसभेच्या वांगडीपदा खातीर मतदान जालें. ह्याच काळांत आदले केंद्रीय मंत्री भानुप्रकाश सिंह हांची गोंयच्या राज्यपालपदार नियुक्ती केल्ली.
राज्यभर भंय निर्माण करपी ’गोवा प्रोटेक्टर्स’ हे संघटणेचेर नायक सरकारान कायद्याचो वचक बसयलो. 12 जून 1991 दिसा संघटणेचे अध्यक्ष रुडाल्फ फर्नांडीस दनपरां अडेज वरांचेर पणजे पयले न्यायाधीश दिवेकर हांचे मुखार शरण आयले. सुरवातेक पुलिसांक हे विशीं कितेंच खबर नाशिल्ली. मात, हे विशीं म्हायती मेळटांच तांणी रुडाल्फ हांकां बेडयो घालून राष्ट्रीय सुरक्षा कायद्या खाल (रासुका) अटक केली. ह्यान पयलीं संघटणेची व्हिक्टोरिया फर्नांडीस हांकांय ‘रासुका’खाला अटक केल्ली.
गुन्यांव आनी तस्करी आड उबारलीं खर पावलां
नायक सरकारान वाडपी गुन्यांव आनी तस्करी आड खर पावलां उबारलीं. त्या काळांत कायदो-सुवेवस्थेचें आव्हान गंभीर आशिल्लें, हाचें उदाहरण म्हणल्यार पत्रकार अँथनी फर्नांडीस हांचेर जाल्लो हल्लो. हेच फाटभूंयेर, नायक हांणी गुंडगिरीचो बंदोबस्त करपाक विशेश पुलीस पंगड स्थापन करपाची घोशणा केली. तशेंच तस्करीचेरूय कारवाय केली. 11 जुनाक सासश्टी म्हालांतले दोन आमदार स्मगलिंग एजंट आशिल्ल्याची म्हायती गोंयचे अतिरिक्त कस्टम कलेक्टर दयाशंकर हांणी दिल्ली, तर 21 सप्टेंबर 1991 दिसा आदले मुख्यमंत्री चर्चील आलेमाव हांकां ‘कोफेपोसा’ कायद्या खाला अटक केली.
प्रशासकी वळख आनी समाजीक उपक्रम
एके वटेन खर भुमिका घेतना नायक हांणी प्रशासक म्हणूनय आपली वळख निर्माण केल्ली. मोट्यान आवाज करपी मोटारसायकलींचे सायलेन्सर काडपाचो तांचो आदेश आयजूय खुबश्या जाणांच्या लक्षांत आसा. 18 जुनाक तांच्या सरकारान 48 सुटके झुजार्यांचो सत्कार केलो. तांच्या कामाक लागून पणजे तांचो भोवमानूय केलो, हाका लागून तांची लोकप्रियता दिसून येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
