भांगरभूंय | प्रतिनिधी
पणजी : कार्यकर्ते आनी जनतेचो कल मतींत घेवन राजकी निर्णय घेवपाक स. रवी नायक बरेच फिशाल आशिल्ले. 1991 वर्सा मगोच्यान कॉंग्रेसींत प्रवेश करून तांणी कॉंग्रेसीच्या हातांतल्यान गेल्ली सत्ता कॉंग्रेसीक मेळोवन दिवपाक म्हत्वाची, निर्णायक भुमिका केल्ली. उपरांत ऑक्टोबर 2000 वर्सा कॉंग्रेसीच्या हेर आमदारां सयत रातोरात भाजपांत प्रवेश करून तांणी राज्यांत पयलेच फावट भाजपाचें सरकार स्थापन करपाक व्हड योगदान दिल्लें.
1999 चे विधानसभा वेंचणुके उपरांत लुईझीन फालेरो हांच्या नेतृत्वा खाला राज्यांत कॉंग्रेस पक्ष सत्तेर आयिल्लो. सुमार 4 म्हयन्यां उपरांत कॉंग्रेस सरकाराचो मोरया जाल्लो. कॉंग्रेसीक सोडपाची चीट दिवन फ्रान्सीस सार्दीन हांच्या नेतृत्वा खाला कॉंग्रेसीच्या आमदारांनी स्वतंत्र प्रादेशीक पक्ष स्थापन केलो आनी भाजपाच्या फाटबळार सरकार स्थापन केलें. भाजपाचे ह्या वेळार 10 आमदार आशिल्ले. सुमार 11 म्हयन्या उपरांत भाजपान सार्दीन सरकाराचें फाटबळ काडलें आनी सार्दीन सरकार कोसळ्ळें.
रवी नायक ह्या वेळार कॉंग्रेस विधिमंडळ गटाचे फुडारी आशिल्ले. रवी नायक हांच्या नेतृत्वा खाला कॉंग्रेसीच्या कांय आमदारानी वेगळो गट स्थापन करून भाजपांत प्रवेश केलो आनी ऑक्टोबर 2000 वर्सा मनोहर पर्रीकार हांच्या नेतृत्वा खाला पयलें भाजप सरकार स्थापन जालें. रवी नायक हे सरकाराचे उपमुख्यमंत्री आशिल्ले. तशेंच भौशीक बांदकाम, बायलां आनी बालकल्याण हीं म्हत्वाचीं खातीं तांचे कडेन आशिल्लीं. कॉंग्रेसींतल्यान भाजपांत प्रवेश केल्ले रमाकांत खलप, शेख हसन अरुण, संजय बांदेकार, प्रकाश वेळीप, मनोहर आजगांवकार, जुजे फिलीप हेय सरकारांत मंत्री आशिल्ले. कॉंग्रेस आमदारांच्या भाजप प्रवेशाक लागून पर्रीकार सगल्यांत पयलीं मुख्यमंत्री जाल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
