भांगरभूंय | प्रतिनिधी
सद्याक रामा काणकोणकार गाजत आसा. कांय दिसां पयलीं ताचेर हल्लो जालो. जे तरेन ताका मारून ताचो व्हिडियो काडला तो पळेल्यार मार घालपी हे मनीस न्हय तर हैवान म्हणपाचें कोणूय सांगतलो. सद्याक गोंयांत कोणाकूच कायद्याचो भंय उरूंक ना म्हणपाचें दिसून येता. दर दिसा खंय तरी कितें तरी घडिल्लेंच आसता. रामाचेर जाल्लो हल्लो जावं वा गणेशपुरी – म्हपश्यां घाणेकार घराचेर घाल्लो दरोडो आसूं. गोंयच्या कायद्याची आनी कायदे राखप्यांची कोणूच पर्वा करिना असोच ताचो अर्थ जाता. कोणतरी गोंयांत येतात, ते हांगाचीं घरां तेळटात, घरांत घुसून घरच्यांक भंय दाखोवन सगलें लुटून पसार जातात. आनी आमचे पुलीस सिनेमांत दाखयतात तशें सगलें घडटकूच सुसेगादीन त्या जाग्यार पावतात. रस्त्यार गस्त चालू आसता, नाकाबंदीय केल्ली आसता पूण ताका कांयच अर्थ आसना. चोर लुटून चल्ले. हो कितें पयलोच दरोडो न्हय वा हो निमाणोय आसचो ना हाची जाण दर एकल्यान दवरूंक जाय. आनी जमलेंच जाल्यार आपणाली रक्षा आपुणूच कशी करतलो हाचेर विचार करूंक जाय. राखण म्हणून आमी सी सी कॅमेरा बसयतात पूण बुरखाधारी कॅमेऱ्यांत आयलो तरी कसो कळटलो? देखून हाताक मेळटा तशें एखादें शस्त्र दवरचेंच पडटलें. आनीक पर्याय ना काय दिसता.
आयजवेर कितले दरोडे पडले. एकाचो तरी सोद लागला? ना, अशीच जाप मेळटली. म्हजो एक इश्ट सदांच म्हणटा जेन्ना पुलीस आनी शेट प्रामाणीकपणान वागतले तेन्नाच ह्यो चोरयो आनी दरोडे पडपाचें बंद जातलें. ताच्या मतान पुलिसांक चोर खंयच्यान येतात, खंयच्या वेळार येतात आनी चोरी केले उपरांत खंय वतात तें बेस बरें खबर आसता. आमच्या पुलिसांनी हाचे पयलीं भायल्या राज्यांनी वचून चोरांक धरून हाडिल्ले आसात. ज्या वाठारांत वचूंक थंयचे पुलीस भियेतात अश्या वाठारांत घुसून आमच्या पुलिसांनी चोरांक बेडयो घालून हाडल्यात. हाचोच अर्थ पुलीस असलीं कामां करूंक शकतात. फक्त ते प्रामाणीक आसूंक जाय. कोणाचेंच दडपण तांणी घेवंक फावना. मेकळेपणान जर तांणी काम केलें जाल्यार चोरांक आनी गुंडांक भंय पडूं येता.
जशे पुलीस प्रामाणीक आसूंक जाय म्हणटात तशेच शेट प्रामाणीक आसूंक जाय. खंयच्याय शेटीक आपणा कडेन विकूंक आयिल्लो भांगराचो म्हाल वळखूंक येता. हें भांगर खंयच्या वाठारांतलें आनी तें कोणें घडयलां आसतलें हाची जाण तांकां आसताच. सगल्या शेटींनी जर थारायलें की आमी चोरयेचो म्हाल घेवचे नात तर चोरयेचें भांगर खंय विकतले? आनी असल्यांक जर गिरायकूच मेळ्ळें ना जाल्यार ते भांगर चोरतले कित्याक? सराफांनी मनांत हाडल्यार देशांतल्यो कितल्यो तरी चोरयो बंद जावंक शकतात. पूण सगल्यांकूच बेगीन गिरेस्त जावचें आसता. कोणाक दरोडे घालून दुडू जोडचे आसतात तर कोणाक सवाय भांगर घेवन आपलो लाव करचो आसता. हाकाच लागून चोरांचें फावता आनी तांकां जेल मेळटा. तातूंत आमकां तर भांगरा बगर जायच ना. हातांत, गळ्यांत कांयच घालें ना तर लोक कितें म्हणटले? आमकां लोक कितें म्हणटले होच चड हुस्को. आनी ह्याच हुस्क्याक लागून आमी आमचें लुकसाण करून घेतात. वेळा प्रसंगाक जिवाचेरूय उदार जातात. दर दिसा कोणाच्या तरी गळ्यांतली सरपळी वा मणी ओडून काडलो म्हणपाचें आयकूंक येता. आनी तो सांबाळूंक वतना जमनीर पडून हॉस्पिटलांतूय वच्चें पडटा. कितल्या तरी बायलांचे मणया वांगडा दांत पडिल्ल्याचीं उदाहरणां मेळटलीं. तरी आमी सुदारतात? ना!
बरें हे सगले चोर काय बांगलादेशांत पळून वचनात. हांगाच मोटारसायकली घेवन भोंवतात ते, मागीर पुलिसांक कशे मेळनात? पुलीस आपलें काम सारकें करिनात असोच ताचो अर्थ समजुपाचो? हय असो समज जावं येता. रामान हॉस्पिटलांतल्यान भायर सरना फुडेंच जो बाण सोडलो ताचे वेल्यान तरी असोच समज जावं येता. रामान सांगलां तें जर खरें आसत जाल्यार पुलीस कोणाच्या तरी दबावा खाला काम करतात म्हणचें पडटलें. रामान दोन मंत्र्यांचेर दुबाव उक्तयला. तांतलो एक मुख्यमंत्री आसा जाचे कडेन गृह खातें आसा. रामान सांगलां तें खरें आसा अशें धरलें जाल्यार पुलीस हाचो तपास करूंक पावतले? आपल्याच सायबा आड वतले ते? जातलें तांकां धाडस? आनी योग्य तपास करून पुलिसांनी सत लोकां मुखार हाडलें तरी लोकांक तें खरें दिसतलें? समजुया रामान सांगलां तें फट. पूण लोकांक तशें दिसूंक जाय न्हय! राजाची बायल पतिव्रता आसली म्हूण जायना, तिणें तें सिद्ध करचें पडटा. हांगाय गृह मंत्र्यान आपलो वा आपल्या मंत्र्याचो ह्या प्रकरणांत हात ना हें सिद्ध करचें पडटलें.
हे खातीर तपासाक वेगळी दिशा दिवची पडटली. एक तर तपास सिबिआय वतीन करपाचो वा खंयच्याय हायकोर्ट जज्जाची समिती करून ताचे वतीन तपास करपाचो. हातूंत मंत्र्याचो हात ना म्हणपाचें थारलें जाल्यार रामान भायर सरना फुडें मंत्र्यां कडेन बोट कित्याक दाखयलें? कोणें ताका तशें करूंक सांगलें? विरोधकांतल्या कोणे काय सरकारांतल्याच कोणे ह्या प्रस्नांच्यो जापो मेळोवच्यो पडटल्यो. सरकारी पक्षांतले जायते असंतुश्ट मंत्रीपदाची वाट पळेतात. कांय जाणांक मुखेलमंत्र्याची खुर्ची खुणायता. हांतलेच बी कोण काय? जनतेक ह्यो जापो मेळुंकूच जाय. ते खातीर योग्य तरेन आनी गृह मंत्र्याच्या दबावाविणें तपास जावंक जाय. मुख्यमंत्र्यान हाचेर विचार करून योग्य असो निर्णय घेवचो आनी लोकांच्या मनांतलो गैरसमज पयस करचो. निमाणें सत भायर येवंकूच जाय.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
