भांगरभूंय | प्रतिनिधी
दोनूय जिल्हो पुलीस अधीक्षकांची बदली करपाची मागणी
म्हापशेंः गणेशपुरी, म्हापशेंच्या डॉ. घाणेकर हांच्या बंगल्याचेर दरोडो घाल्ले दरोडेखोर बांगलादेशांत पळून वचपाक येसस्वी जालें. हाचोच अर्थ गोंय पुलीस यंत्रणेक अपेस आयलें देखून हें आयपीएस अधिकार्यांचे अपेस आसा. सरकारान बेगोबेग दोनूय जिल्ह्यांच्या पुलीस अधीक्षकांची बदली करून तांचे सुवातेर गोंय पुलीस सेवेंतल्यान सक्षम थळाव्या अधिकाऱ्यांची नेमणूक करची अशी मागणी समाज कार्यकर्ते अॅड. महेश राणे हांणी केली. मंगळारा म्हापशें जाल्ले पत्रकार परिशदेंत ते उलयताले.
म्हापशें दरोडे घडणुकेक एक सप्तक जालें तरी पुलीस अधिकाऱ्यांनी एकूय उतर काडूंक ना हें दुर्दैवी. हाचे वयल्यान आयपीएस अधिकारी गोंयकारांचे सुरक्षे विशीं कितले गंभीर आसात तें स्पश्ट जाता. गृहमंत्री पद सांबाळपाक येना देखून कृशी मंत्री रवी नायक वा भलायकी मंत्री विश्वजीत राणे हांकां मुख्यमंत्र्यान हें मंत्रीपद दिवचें अशीय मागणी राणे हांणी केल्या.
हाचे पयलीं पुलिस लोकांच्या सुरक्षे खातीर गरजेची जतनाय घेवन वाठारांत गस्त घालताले. सध्या पॉयंट आनी चेकपोस्टांचेर तैनात आशिल्ले पुलीस वा अधिकारी वेळार येनात. फकत नांवा पुरतीच रातची गस्त आसता. म्हापशें मार्केटाच्या मुखेल प्रवेशदाराचेर सशस्त्र पुलिसां खातीर बूथ बसयल्लो. थंय सशस्त्र पुलीस तैनात करतले अशें सांगिल्लें. हे गजालीक कितलेशेच म्हयने जाले तरी लेगीत हांगा सशस्त्र पुलीस केन्नाच दिसूंक नात. लोक आपल्याच घरांत सुरक्षीत नात जाल्यार मागीर म्हजे घर हे येवजणेचो कितें फायदो अशी टीका अॅड. राणे हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
